L'ASTURIES LLIBERAL

L'activista saharaui Aminetu Haidar, en fuelga fame dende'l pasáu 16 de payares pola mor la so espulsión a Lanzarote dende El Aaiún, poles autorides marroquís, dixo que "ta decidida a dir hasta'l final" na so protesta y será'l Gobiernu español el "responsable" de lo que-y puea soceder.

   Ye'l mensaxe que tresmitirá a Agustín Santos, xefe de gabinete del ministru d'Asuntos Esteriores Miguel Ángel Moratinos, que se treslladó esti xueves a Lanzarote pa ver a l'activista y repetir la ufierta del Gobiernu socialista de da-y l'estatuts de refuxada o un pasaporte español.

   Haidar insiste en que nun vino a España por "propia voluntá", sinón que lo fizo "obligada". "Marruecos secuestróme, detúvome, torturóme, alloñóme de los mios fíos", pero, afirma la conocida como 'Gandhi saharaui', "eso nunca me mancó tanto como lo que ta faciendo España, un país democráticu y un Estáu de Derechu".

   "Yo nun creé esta situación de crisis, son los gobiernos español y marroquí los responsables", insiste, asegurando que'l so únicu oxetivu ye volver a El Aaiún, "onde tán los mios fíos, con o sin pasaporte".