L'ASTURIES LLIBERAL

FONTE L'Arribada.

Javier Cubero de Vicente (Xixón, 1986) foi'l ganador de la segunda edición del Premiu 'Fierro Botas' d'ensayu y trabayos d'investigación que convoca l'Ayuntamientu de Xixón, per aciu de la conceyalía de Cultura Tradicional y Llingua Asturiana. La obra que llogró'l gallardón titúlase Del romanticismu al rexonalismu: Escritores carlistes na lliteratura asturiana. Nella faise un análisis históricu del carlismu nel Reinu y n'Asturies y axúntase una estaya onde s'estudia a un grupu d'autores qu'engloba dientro de l'afección a esta ideoloxía, que van de Xuan María Acebal a Enrique García-Rendueles. El premiu ta dotáu con 4000 euros y conlleva la publicación del trabayu.
El xuráu formáronlu pa esta edición Roberto Colunga (presidente), en representación de la conceyalía de Cultura Tradicional y Llingua Asturiana, Jaime González-Fierro, filologu, profesor de Secundaria y representante de la familia González Fierro, Miguel Ramos Corrada, Vicepresidente de l'Academia de la Llingua Asturiana, Rafael Rodríguez Valdés, historiador y ganador del premiu na so edición primera, Jesús Ángel Fernández, filólogu y teólogu, xesuita miembru de la comunidá del Natahoyo a la que pertenecía Federico Fierro, Ana Vanessa Gutiérrez, escritora, Beatriz Rodríguez Viado, directora del semanariu Les Noticies, Humberto Gonzali, escritor y xestor cultural, miembru de la Xunta Rectora de la FMCEyUP del Ayuntamientu de Xixón y miembru de númberu del RIDEA, y María Xosé Rodríguez, responsable de la Oficina Municipal de la Llingua de la FMCEyUP del Ayuntamientu de Xixón, actuando como secretaria del tribunal.