El Círculu Lliberal d'Asturies ye un proyectu de calter asociativu asturianista, democráticu y transversal
EL COMERCIO. SIXTO CORTINA
DE les munches cares de l'anomalía asturiana, del nuestru xeitu esquizoide de tar nel mundu, la presencia d'IU nel Gobiernu asturianu ye una de les más interesantes. Nun falamos, obviamente, de la lexitimidá de la izquierda alternativa, ecoloxista, feminista y hasta asturianista d'engolase hasta les altures gubernatives, porque en democracia los votos son sagraos; nin tampoco de qu'un partíu con traces antisistema tenga responsabilidaes dientro del sistema mesmu, porque l'exerciciu del poder amansa l'espíritu más revolucionariu. Lo que choca ye la insistencia del sociu de coalición del PSOE por tar nel Gobiernu y, al tiempu, siguir faciendo oposición, ello ye, por ser y nun ser, por tocar la gaita y andar a la procesión. Nun sabemos si esti proceder ye una suerte d'estratexa política, una manifestación del espíritu rebecu de la izquierda más izquierda o simple casualidá. Pero nun hai selmana en qu'IU, que ta nel Gobiernu asturianu, nun ataque a persones o polítiques d'esi Gobiernu en público. Uno imaxina qu'en tantos gobiernos y estructures de poder la toma de decisiones debe de ser bien enguedeyada, con alderiques apasionaos, intereses escontraos, engarradielles personales, etcétera, pero, en decidiendo una cosa, la lealtá y'l compromisu de tener aceptao la pertenencia a esi grupu anubren les diferencies por mor de la eficacia y la dignidá. IU nun piensa lo mesmo. Ellos pueden aprobar los presupuestos asturianos, pero denunciar los sobrecostes d'El Musel delantre de la UE; ellos pueden tener conseyeros nel Gobiernu, pero llantase firmes contra'l proyectu d'incinerar basures como alternativa al escosáu vertederu de Serín; ellos pueden sentase a negociar y pactar con Javier Fernández, secretariu de la FSA, y dir un añu y otru a manifestase pola oficialidá del asturianu; ellos pueden votar una y otra vegada col PSOE na Xunta y quexase de los retrasos del AVE, de que nun se paguen les ayudes a los llibros de testu, del hormigonáu de la Ruta l'Alba (Foces de Llaímo)... Esto ye una inxusticia. Los ciudadanos corrientes nun disfrutamos d'esti privilexu d'incoherencia. Los ciudadanos normales nunca podríemos sentanos nel conceyu d'alministración de la nuestra compañía y nel comité d'empresa al tiempu, porque dalguién nos diba acutar y señalar como indignos, aprovechaos, incoherentes y de pocu créitu. Pero IU n'Asturies (probablemente l'únicu sitiu onde sobrevive de tol Estáu) sí puede ser republicana y, más entá, antimonárquica, y aprobar les subvenciones pa los premios Príncipe, o marutase d'ecoloxista y aplaudir coles oreyes el que se dediquen varies decenes de millones d'euros pa pagar a les empreses eléctriques que quemen el carbón del cambiu climáticu. L'anomalía asturiana tien con IU nel Gobiernu una de les estampes más sintomátiques de la nuestra esquizofrenia. El señor Valledor, principal afalagador d'esti xeitu de facer política gubernamental-opositora, diz que fai falta fundar otru partíu n'Asturies, al tiempu que participa nel Gobiernu del presidente Areces y al tiempu que conmemora'l 75.º aniversariu de la Revolución del 34, de la que diz representa l'espíritu que lu anima a él y a los suyos a tar na cosa pública. Revolucionariu (ello ye, golpista con violencia), opositor (ello ye, demócrata enfotáu n'alternancia) y gobernante (ello ye, responsable de la realidá del día a día ciudadanu). El doctor Jekyll nun algamó tanto como la nuestra IU de personalidá múltiple.
Esbilla
del.icio.us
Mui bono. Ensin escaecer la represión llingüística cuando Valledor yera conseyeru de xusticia. Cuando, tamién, empapelaron a Cándido y Morala y a los rapazos de Cangues d'Onís. Tamién taba cuando lo de Fer. Ensin escaecer el so servilismu cola boda principesca, como recuerda David Rivas nel so blog de güei.
Nun toi d'acuerdu, la verdá que toles asociaciones político-culturales que xiren na orbita d'IU tán bastante calladines y nun gorgutien pallabra.