L'ASTURIES LLIBERAL

Intervención d'Humberto Gonzali na inauguración de l'Arribada 2009

Arribamos güei, per cuarta vegada, a una nueva fiesta de la lliteratura y de la cultura propio. Un añu más, afitamos en Xixón l’escenariu per onde van dir pasando exemplos del meyor facer de los nuestros escritores, de la xente de la cultura autóctono, d’invitaos llegaos de territorios culturalmente hermanos. Asturies ye poseedora d’un cientu ayalgues milenaries, y con elles, d’unu de los más importantes patrimonios que se puea aportar a la cultura universal dende cualaquier comunidá humana: una llingua.  

Ye esta llingua, que nos define en muncho a la xente asturiano, y que caltria tolos aspectos de la cultura, dende la estaya más tradicional hasta los últimos espacios apinaos de modernidá, una realidá viva, cambiante, arriquecedora, y bien presente, pasu ente pasu, en más ámbitos de la nuestra sociedá.  Y pol fechu de que la llingua ye dalgo de nuestro, por ser asturiana, ye la llingua de toos. N’asturianu falaron campesinos, pescadores, trabayadores de la industria, y tamién los reyes, nobles, ilustraos como Xovellanos, xenerales, obispos. N’asturianu falaron monárquicos y lliberales, conservadores y progresistes. Y n’asturianu siguen falando, anguañu, miles de persones de tou tipu y condición. Con esti idioma tán forxaos los llibros que nes décades más de recién vienen aportando’l so valir na fechura d’una lliteratura de calidá, enraigonada nel país y al empar universal, abierta a les corrientes enforma novedoses que xurden pel mundu y bebiendo nes bayuroses fontes de los testos de sieglos anteriores. 

L’Arribada ye un eventu onde s’espeya una esbilla, siempre mínima pola curtiedá de tiempu disponible, del trabayu descomanáu que cientos d’asturianos faen pol desarrollu de la nuestra cultura y, pola mor d’ello, pol progresu y bientar de la sociedá onde viven. La forma que tienen los pueblos de facer pol caltenimientu y la potenciación de la so realidá cultural diz muncho, sinon cuasimente tou, sobre la capacidá d’éstos pa empobinase pel futuru. Los pueblos avanzaos, modernos, y que cuenten con unos dirixentes atentos a les necesidaes de la ciudadanía, respeten y apoyen dafechamente a les sos cultures, tanto más cuando atesoren una llingua única nel planeta, y persaben ensin complexos enfotase nesta xera, ensin tener de renunciar por ello a que lo más patrimonial de so tamién tea venceyao de mou xustu y constructivu a lo universal. Los pueblos intelixentes, los pueblos cultos y na vanguardia de la historia, xestionen cola racionalidá el devenir de les sos cultures. 

Pela Arribada 2009, en diecisiete díes d’actividá, han pasar más de ciento cincuenta escritores, van presentase decenes de títulos d’obres lliteraries y d’investigación, revistes y bitácores, proyectaránse grandes clásicos de la cinematografía y documentales col elementu común que ye l’usu del ’idioma asturianu, fadránse tertulies y lleeránse comunicaciones, ponencies y conferencies, habrá llugar pal teatru y pa les actuaciones musicales. Nesta Arribada tendráse na acordanza, per aciu d’unos sentíos homenaxes, a tres figures señeres de la nuestra cultura, al barítonu xixonés don Antonio Medio , a la escritora valdesana doña Nené Losada Rico, que tristayamente yá nun s’afayen ente nós, y al tapiegu don Manuel García ‘El Galano’, decanu de los escritores en gallego-asturianu y gallardonáu col Premiu Timón d’esti añu.  

En definitiva, pelo llargo de cuasi trés selmanes, l’Arribada, que yá ye per sí un eventu d’especial relevancia, aportará con una intensa vagamar lliteraria y cultural nesta villa de Xixón onde tantos nomes dio la lliteratura autóctono, y teniendo como centru principal de les sos actividaes esti Antiguu Institutu onde estudiaren tantos xixoneses y onde impartiera clases, ente más otros,  don Enrique García-Rendueles, responsable de l’antoloxía ‘Los nuevos bablistas’, publicada en 1925 y onde se recueyen testos de gran parte de los poetes del sieglu XIX. Quiciás yera momentu, per iniciativa del que correspuenda, de solicitar una calle pa esti gran asturianista xixonés. 

Hasta’l viniente trés d’ochobre les puertes de l’Arribada tán abiertes pa tola ciudadanía que tenga a bien afondar na conocencia de la nuestra lliteratura y de la nuestra cultura.Sían entós bien arribaos y bienllegaos.

Publicao por César Vaquero