L'ARRIBADA 2009 desarrollará'l so programa lliterariu y cultural pelo llargo de venti díes L'ASTURIES LLIBERAL

Semeya de la inauguración de l'Arribada del añu pasáu

El día 14 del prósimu mes de setiembre entama la que ye, hasta agora, l'Arribada (Vagamar lliteraria y cultural) más llarga d'ente toles que se ficieren. Dende qu'esti orixinal eventu apenzó la so andadura, en 2006, fuere creciendo tanto en conteníos como en díes de duración. La coordinación, dende la primer edición, llévala l'escritor y xestor cultural Humberto Gonzali, convirtiéndose pasu ente pasu l'Arribada nel foru más importante de los qu'añalmente se perfaen pa la promoción de la lliteratura asturiana. Nel presente añu afáyase una iniciativa que llogra l'afitamientu definitivu y que consagra'l so calter abiertu y democráticu. Per otra parte, enancha la so programación pelo llargo de trés selmanes, del 14 de setiembre al 3 d'ochobre, y ufiertará recitales, homenaxes a lliteratos del país, esposiciones, presentaciones de llibros, tertulies, ponencies, comunicaciones, actuaciones de toa triba, colo que se vertebrará un conxuntu d'intenses xornaes col envís de facer visibles pa la ciudadanía asturiano los productos culturales y lliterarios de la nuestra comunidá autónoma. En Xixón, dende'l 15 de setiembre y hasta'l 30 del mesmu mes, desarrollaránse nel Centru de Cultura Antiguu Institutu, allugáu na cai Jovellanos 21. Del 1 al 3 d'ochobre l'actividá va abellase nel Muséu del Ferrocarril de la mesma ciudá, na Plaza Estación del Norte, teniendo amás un actu de la estaya Sones nel pub Ca Beleño. En Villaviciosa, el 14 de setiembre, habrá una intensa xornada na Sala Polivalente de la Plaza Obdulio Fernández, abriendo asina un camín nuevu, el d'Arribaes per Asturies, que nagua por venceyar a un conceyu asturianu cada añu. Nel casu de Villaviciosa, l'Arribada cuenta cola collaboración d'una asociación maliaya La Compaña del Ronchel.

Publicao por César Vaquero