L'ASTURIES LLIBERAL

El conceyal de Partíu Popular, Manuel Pecharromán, reclamó güei del Ayuntamientu la protección y conservación del patrimoniu etnográficu del conceyu, col motivu del valtamientu d'un horru nel polígonu industrial de Llorea, en Tremañes. Según Pecharromán, esti casu "evidencia una mala xestión del patrimoniu etnográficu per parte del Ayuntamientu y de la Conseyería de Cultura". Igualmente afirmó que "si esistía un mal usu del horru, l'Ayuntamientu taba obligáu a qu'esa conservación se ficiere bien o bien a la reposición del elementu al so estáu anicial. Desgraciadamente Xixón adica como otru horru ye destruíu".

Pela so parte, el tamién edil popular, Francisco Rodríguez Cubiella, anunció que'l PP va proponer al restu los grupos municipales l'entamu añal d'una entrega de premios pa gallardonar a aquellos que trabayen na conservación del patrimoniu asturianu. Amás d'una placa, Cubiella esplicó que se quier dar un premiu en metálicu, empobináu a l'ayuda de los estudios previos d'investigación fechos nel campu etnográficu, asina como al caltenimientu de los horros. El grupu municipal popular propón que la entrega d'estos premios sía'l 29 de setiembre y aguarden contar col sofitu del Gobiernu local pa que s'empiecen a cellebrar dende l'añu que vien.

Sobre'l tema del horru de Tremañes faló un representante socialista, Faustino García, conceyal de Caltenimientu Urbanu y Rural, que dixo que l'horru "tenía un altu nivel de deterioru y que nun tenía'l valir d'otru que tuviere en perfechu estáu", polo que xustificó'l so valtamientu. Aseguró que ye "difícil" controlar l'habituación de los horros como viviendes y que los propietarios nun tienen "nenguna obligación pal so caltenimientu".

Publicao por Alejandro García Avendaño

Esbilla | del.icio.us