L'ASTURIES LLIBERAL

ep. La Xunta pola Defensa de la Llingua Asturiana considera que'l Gobiernu del Principáu ta renunciando "a la financiación que van tener toles comunidaes con llingües cooficiales", al nun dar esta reconocencia al asturianu.

Al traviés d'un comunicáu consideró "irresponsable y contraria a los intereses de los ciudadanos", l'actitú que ta teniendo'l Gobiernu na negociación de la financiación autonómica. "Nuna situación de crisis económica grave, falta de trabayu y recorte nos servicios públicos, los dirixentes asturianos, escoyíos pa procurar el bienestar y desarrollu de la sociedá, quieren más dexase llevar polos sos propios prexuicios y renunciar a los millones d'euros (casi 30, nel casu de Galicia), que l'Estáu va tresferir a les comunidaes autónomes que recueyen nos sos estatutos la cooficialidá de les llingües propies".

D'esta manera, "los políticos asturianos siguen aneciando non sólo na falta de reconocimientu de la igualdá xurídica de los falantes d'asturianu, sinón tamién nel despreciu de partíes presupuestaries que diben vali, p'asegurar derechos de los sos ciudadanos y pa estimular l'actividá económica d'Asturies".

La Xunta pidió una reforma del Estatutu que "reconoza la oficialidá de la llingua asturiana pa que los ciudadanos asturianos tengamos derechos cívicos y económicos fundamentales pal futuru d'Asturies".