L'ASTURIES LLIBERAL
Bitácora del Círculu Lliberal d'Asturies

Isolina Rodríguez del Valle. Inmaculada Gallart, conceyala del PP nel Ayuntamientu de Xixón, propunxo ampliar la 'Operación Añoranza' a emigrantes asturianos residentes en países d'América Central, del Caribe y Méxicu. Hasta agora, la operación afleuta namás a los asturianos que viven en Cuba. "La Operación Añoranza favorez dende fai 19 años a Cuba y favorez namás a estos emigrantes y consideramos que la vixésima edición del programa tien de facese con otros países", dixo la edil popular tres plantegar esta propuesta a la comisión municipal de Polítiques Sociales. Gallart espresó igualmente la disposición del PP "pa collaborar col conceyal de Cooperación p'ampliar la operación y ponese en contactu colos centros asturianos n'otros países, si él y los sos trés asesores nun puen facelo". Tamién comunicó la so intención de plantegar al director de l'Axencia Asturiana de Cooperación al Desarrollu, Rafael Palacios que se coordine la 'Operación Añoranza' del Principáu coles de los conceyos, pues "tán produciéndose agravios comparativos porque si bien la operación autonómica pon llendes pa que les mesmes persones nun puean venir tolos años, les de los ayuntamientos permiten qu'un mesmu emigrante puea viaxar a Asturies dellos años seguíos al tener familiares n'estremaos conceyos".