El Grupu Municipal Popular de Xixón aconceya con representantes de trabayadores interinos d'ArcelorMittal, con padres del Colexu de Cabueñes y con pescadores de la flota del puertu xixonés L'ASTURIES LLIBERAL

Isolina Rodríguez del Valle. La presidenta del Partíu Popular de Xixón, Pilar Fernández Pardo, y conceyales del Grupu Popular, caltuvieron na mañana del pasáu vienres, na Casa Conceyu, un alcuentru con representantes de los 450 trabayadores interinos d'ArcelorMittal. Nesi aconceyamientu, el Grupu Popular amosó la so esmolición y l'apoyu a los miembros d'esti colectivu que s'afayen en desempléu dende ochobre de 2008. Según esplicaron los trabayadores interinos, esiste actualmente una importante cartera de pedíos y el fornu altu A de Xixón, tres del zarramientu del fornu B, funciona al 120% de la so capacidá, polo que piensen que se dan les condiciones pa la reactivación del fornu paralizáu. Fernández Pardo denunció'l fechu de que nos topemos con un Gobiernu autonómicu y un equipu gobiernu municipal totalmente pasivos, que dexen ensin abellu a estos trabayadores.

Per otra parte, Pilar Fernández Pardo y los conceyales tamién recibieron na Casa Conceyu a representantes de los padres del Colexu de Cabueñes. L'edil popular Manuel Pecharromán fizo recordanza de qu'esta mesma selmana'l Conseyu Escolar Municipal aprobare una propuesta presentada pol Grupu Popular pa esixir a la Conseyería d'Educación del Principáu qu'asuma la necesidá d'ampliar les instalaciones del Colexu de Cabueñes, que facilite aules abondes a los escolinos pa que nun faiga falta abrir un aula mista y dee garantíes a los 300 alumnos del centru pa tener unos correchos servicios hixiénicos.

Igualmente hubo un aconceyamientu con representantes de la flota pesquera del puertu d'El Musel, de la que formen parte 106 pescadores, qu'atraviesen una crítica situación pola mor de la falta piesca en Xixón, provocada, según espusieron, poles obres d'enanchamientu del puertu xixonés. El Grupu Popular comprometióse a demandar l'estudiu correspondiente que recueya los daños que vien provocando esta obra na piesca de Xixón, y a promover iniciatives pa que se compensen les pérdides per parte de les autoridaes competentes.