L'ASTURIES LLIBERAL

HUMBERTO GONZALI. Esti 1 de mayu los 'sindicatos de clase' quitaron el mazcaritu. En toles manifestaciones qu'entamaren UGT y CCOO la consigna yera la mesma, atacar a los empresarios. Y con eso, amuesaron que nun son otra cosa qu'unos pagaos de la malagobernanza socialista. A nenguna d'estes fuerces sindicales se-yos sintiera un res cuando'l Gobiernu Zapatero negaba la crisis. Nengunu de los militantes qu'hai tres d'eses sigles protestó al altu la lleva cuando los socialistes decíen qu'enxamás llegaríemos a los cuatro millones de paraos. Tovía nengún de los sindicatos perconoció que'l mayor problema de la crisis ye'l propiu Gobiernu, ineficaz ya inactivu por demás. A UGT y CCOO paez que-yos presta la frivolidá del peor presidente del Gobiernu d'España en tola historia. Normal; porque toos son igual de frívolos. Porque, ¿acasu representen los sindicatos a tolos trabayadores del nuestru reinu, a los inmigrantes, a los autónomos? Digamos les coses como son, a estos 'compañeros del sindicatu' namás-yos interesa un tipu d'asalariáu, aquél que tien un trabayu fixu y ta nuna empresa que cuente con un númberu curiosu d'empleaos. Los demás, que son la inmensa mayoría, nun paguen la pena. Importen los que puen xenerar lliberaos sindicales y poro nun quieren falar nin por asomu de reforma llaboral. Los sindicatos deféndense a ellos mesmos, a les subvenciones que-yos otorguen, al bon rollu colos políticos d'izquierdes que xenera prebendes y un pesu social descomanadamente sobrevaloráu. Estos sindicatos lluchen polos sos privilexos. Los n'otru tiempu sindicatos de clase son güei sindicatos clasistes. Y ye por eso que nun puen aidar na igua del problema de la crisis; porque ellos, como Zapatero y los sos ministros, son parte del problema.