L'ASTURIES LLIBERAL

EP. El conceyal de Cultura y Deportes y presidente de la Sociedá Uvieína de Festexos (SOF), José Suárez Arias-Cachero, espresó güei en rueda prensa con motivu de la presentación del 'Folclore na cai', el so descontentu cola decisión de pagar 3.000 euros a la Sociedá Xeneral d'Autores (SGAE) por derechos d'autor demientres el desarrollu de les actividaes de los grupos folclóricos y les bandes de gaita.

"Paezme dalgo escandaloso que tengamos que pagar esta cantidá a la SGAE, tán cobrando pol trabayu de los grupos folclóricos y nun sabemos a ónde va esi dineru, pero nós tenemos que cumlir la llei", añadió'l conceyal.

Silvia Suárez García, miembru del grupu de baile 'Filandón' y presente al actu, espresó la so disconformidá cola decisión de la SGAE y se mostró sorprendida, dao qu'ellos recueyen bailles tradicionales y la Sociedá d'Autores nun-yos paga nada. "Tienen 'un morro que se lo pisan', si nós pensamos editar un CD de música tradicional y naide mos paga nada, ye vergoñoso que tengamos que pagar nós por obres que son propies", espresó Silvia Suárez.

Per otra parte, Cachero anunció que nesta ocasión, dada la situación económica y continuando cola política d'austeridá per parte del equipu de Gobiernu ficieron un "pequeñu recorte" anque'l programa se caltién.

"Trátase de 84 actuaciones de grupos folclóricos y 84 de bandes de gaites que van durar dende'l día 1 de marzu hasta'l mes de payares, incluyéndose actuaciones dientro de les fiestes de L'Ascensión y San Matéu", esplicó José Suárez Arias-Cachero.

L'Ayuntamientu d'Uviéu destinó pa esta actividá 143.000 euros de los cuales como anunció Cachero, 3.000 son pa la SGAE y recordó'l conceyal que l'Alministración Rexonal, "tampoco realizó nenguna ayuda, contrando esti programa con cero euros per parte del Gobiernu rexonal".

El programa implica a tolos grupos folclóricos y bandes de gaites de la ciudá d'Uviéu, según pallabres del rresidente de la SOF, qu'añadió qu'esta actividá va tener beneficios pa la ciudá. "Ye una opoturnidá pa que'l folclore tenga presencia na ciudá y ye un elementu d'identidá turística", destacó Cachero.

Ente les novedaes del programa, destaquen la reducción del equipu téunicu y la realización de les actividaes demientres un mes menos con un descensu de 25.000 euros nel so presupuestu, según informó'l conceyal de Cultura.

"Caltiénense los horarios pero s'amplíen le zones, amás del cascu históricu, van tener presencia na zona hostelera tanto les cais Gascona como Manuel Pedregal", apuntó'l director técnicu d'Actividaes Folclóriques de la SOF, Adolfo García Blanco.

Según el programa, l'asociación folclórica 'El Castiellu' d'Olloniego va ser la encargada d'abrir les actuaciones el próximu domingu día 1 de marzu, acompañada pola Banda de Gaites del Centru Asturianu.

Esbilla | del.icio.us