L'ASTURIES LLIBERAL

LA SIDRA (númberu 60). “La sidra asturiana. Bebida, ritual y símbolo” ye, ensin dulda, el llibru sidreru que más ésitu ta collechando de la escasa biblioteca sidrera asturiana. L’autor, David M. Rivas (doctor n’Economía y Profesor Titular d’Estructura Económica na Universidá Autónoma de Madrid. Miembru del Clú de Roma y profesor en dellos centros, tanto europeos como americanos. Asina comu miembru de l’Academia de la Llingua Asturiana), supo amestar la información rigurosa col sentíu del humor sidreru nesti llibru del tou recomendable. Reproducimos un cachu de la entrevista que concedió, col motivu la publicación d'esti llibru, na revista La Sidra, nel númberu correspondiente al mes d'avientu.

Faes un repasu a la hestoria de la sidre dende los romanos fasta’l sieglu XXI ya nun te despeines. Una bébora tan complexa, con tantos matices… ya yes capaz de dar una visión pernidia y amena n’apenes 230 páxines. Va ser verdá que tas destináu polos dioses a enllenar un furacu na biblioteca sidrera asturiana…

Veo que lleiste’l llibru enteru, porque la frase de los dioses ta arrequexada nel prólogu de la primera edición. La historia de la sidre, si la facemos como la d’un fenómenu cultural y non como la d’una bébora, ye apasionante. Siguiéndola podemos seguir el devenir d’una sociedá, especialmente cuando tamos falando d’un pueblu arrodiáu dende siempres y domináu dende van dos sieclos pola cultura mediterránea y la ritualística’l vinu. Pente toles manifestaciones culturales d’Asturies que foran a caltenese nesti procesu de minorización, les que tan al rodiu la sidre son de les más importantes. Por exemplu: siempres la sidre fo bébora popular y despreciao poles clases altes, quitando dalgunos señores rurales y dalgunos lliberales del XIX. Ya eso yá pasaba na edá media y, mui claramente, nel XVII y XVIII con una significativa escepción: Xovellanos.

El chigre surde cola clas obrera, cola proletarización ya industrialización del país. ¿Cuantu d’importante ye’l chigre n’Asturies?

 El chigre ye un elementu vertebrador de la cultura y nel casu de les zones urbanes cuasi podemos dicir que ye l’únicu elementu vertebrador. Nuna sociedá moderna, calterizada por un individualismu mui fuerte y pol francimientu de los vínculos societarios tradicionales, mui visibles hasta hai trenta años, el chigre caltién el papel de llugar d’alcuentru ya’l ritual de la sidra, colectivu y solidariu, cantarín y falanderu, ye’l centru d’esi llugar. Amás, nel chigre produzse un fenómenu mui importante, dalgo que resfuercia esi calter societariu: el ritual ye universal. Un grupu de mozos poco más qu’adolescentes bebe, asítiase y compórtase siguiendo los mesmos cánones que los d’un grupu xubilaos. Compara un chigre colo que te pete: una discoteca, un café, una hamburguesería. Verás que namás nel chigre tan tomando lo mesmo y  faciendo lo mesmo un sesentón de gabardina y boina, un cincuentón d’abrigu y sombreru, una cuarentona de vestíu llamativu y tacón altu ya un rapaz de chupa de cuero con estrelles roxes o pegatines de Dixebra.

¿Por qué destinar un cachu llibru a les etiquetes?

Eso nun fora cosa mía sinon del editor. Cuando s’asoleyara la primer versión l’etiquetáu yera reciente y nun esistíen espublizaciones temátiques. Por exemplu, entá tábamos lloñe d’esa perbona idega de la colleición d’etiquetes de la vuesa revista. D’otra banda, supongo que l’editor pensaba tamién nos beneficios comerciales que-y podía suponer una publicidá nada encubierta de los llagares. Pero esto nun pasó. Los llagareros nun respondieron, amosándose otra vuelta la escosa cultura comercial del sector.

Nos postreros capítulos del llibru fales de la sidre anguañu. Comu doctor n’economía cuál ye’l futuru de la sidre asturiana.

Esbilla | del.icio.us