L'ASTURIES LLIBERAL

EP. El presidente francés, Nicolas Sarkozy, insistió güei na so decisión d'escluyir a España de la llista de participantes del conceyu financieru internacional que va celebrase a mediaos de payares probablemente en Nueva York y dixo que convidar al presidente del Gobiernu, José Luis Rodríguez Zapatero, pue crear problemes con Polonia.

   Sarkozy afirmó ante'l plenu de la Eurocámara que los participantes del conceyu pa "refundar el capitalismu internacional" deberíen ser sólo los países del G-8 y les potencies emerxentes del G-5 (China, India, Brasil, Suráfrica y México), lo qu'escluyiría al presidente del Gobiernu, José Luis Rodríguez Zapatero, que pidió tar nel conceyu. Zapatero tien l'apoyu del primer ministru británicu, Gordon Brown.

   Al entrugase pol pidimientu español na rueda de prensa posterior a la so declaración ante'l Parlamentu Européu, el presidente francés aseguró que Zapatero xugó un "papel considerable" na respuesta de la UE a la crisis financiera porque "foi él el que propunxo'l conceyu del Eurogrupu" de la que salió'l plan de rescate bancariu.

   Pese a esta reconocencia, Sarkozy dixo que nun se trata de crear un nuevu formatu pal conceyu financieru internacional sinón d'adautar los formatos que yá existen, como'l G-8. Nesti sen, resaltó que nun ye él el que decide sobre los miembros del G-8 y que convidar a España "va plantegar tamién el problema de Polonia y los sos 38 millones d'habitantes".

   "Nun soi yo'l que decide los miembros del G-8, nun ye polos mios méritos que Francia forme parte del G-8, alcontréme con esta situación. Tratándose del G-8, podemos desear qu'España, que progresó muncho esti añu, que ye una gran nación, una gran economía, tenga'l so llugar llegáu'l momentu, pero nun soi yo'l que decide", resaltó'l presidente francés.

   "Nun se trata de volver facer lo qu'existe hasta agora, trátase sólo d'alcontrar los formatos meyor adautaos", sorrayó. Esplicó que propunxo que nel conceyu financieru tean representaos el secretariu xeneral de la ONU, el presidente del Bancu Mundial y el director del Fondu Monetariu Internacional, y dixo que si llueu se celebren nuevos conceyos yá se van discutir sobre si les invitaciones s'amplíen a un mayor númberu de países.

   Sarkozy afirmó en tou casu qu'enantes de la conferencia internacional va convocar un conceyu de los cabezaleros europeos pa preparala y llograr que "Europa fale con una sola voz y puea facese oyir".