El Círculu Lliberal d'Asturies ye un proyectu de calter asociativu asturianista, democráticu y transversal
Les Noticies. EDITORIAL.
Nel mes de payares el PP asturianu celebra'l so congresu, que vien precedíu d'un periodu «precongresual» abondo llargu nel que'l puntu d'arrincada bien podía ponese en marzu d'esti añu, cuando la diputada nel Congresu de los Diputaos, Alicia Castro, presentó la dimisión, acompañada de fuertes crítiques a la directiva actual, de la que dixo que «nun pue siguir al frente'l qu'enxamás ganó unes elecciones». Al empar, Castro pidía una renovación que, anguaño, toles facciones que s'enfrenten na organización conservadora aseguren que van facer. Dende la dirección actual, el portavoz parllamentariu Joaquín Aréstegui afirmaba na edición dixital d'esti selmanariu que «la renovación somos nós, el grupu que lidera Ovidio Sánchez», lo qu'argumentaba indicando que taben por dar pasu a xente nuevo nel partíu. Pela so parte, Juan Morales y Pilar Fernández Pardo axunten simpatíes nes sos crítiques a la dirección del partíu y comparten promeses de renovación.
Sicasí, en tou esti tiempu nun se pudo ver cuálos son los proyectos que s'enfrenten nel principal partíu de la oposición, que nos últimos tiempos ta volcáu nos asuntos de casa, lo que lleva a que queden ensin atender les cuestiones públiques, les propuestes y l'acción política que correspuende a una organización de la entidá del PP asturianu. Con too y con eso, a pesar de la dedicación a los temes internos y de la importante repercusión mediática d'estes batalles, faise difícil saber cuáles son les postures que s'enfrenten nesta llucha por garrar la dirección de la fuerza conservadora. De mano, parez lóxico que se quiera camudar un lideralgu que fracasó elección tres elección, pero les preguntes son: ¿cuál ye'l repuestu?, ¿en qué se diferencia del anterior?, ¿qué trai nuevo?, ¿qué conserva?
Los discutinios domésticos de les organizaciones polítiques incúmben-yos a elles mesmes y a la so militancia, pero la postura qu'adopten delantre la realidá cola que-yos toca bregar ye d'interés xeneral. Por eso, yera d'agradecer que los tres sectores fixeren públicos los sos argumentos y les sos motivaciones, de manera que la sociedá pudiera saber cuáles son les opciones polítiques que disputen la dirección del principal partíu de la oposición, pa nun dar la impresión de que se trata namás d'una llucha pol poder. Vimos va poco a Esperanza Aguirre enfrentase ideolóxicamente a Mariano Rajoy y a Alberto Ruiz Gallardón defender les sos postures delantre'l partíu. ¿Hai n'Asturies esti tipu de debates?
Agora nun tamos n'elecciones, un tiempu nel que se fai por comprar votos a ún y otru sector, polo que nun fai falta repetir poses que resultaron, nel casu del asturianu, radicalmente superficiales y oportunistes. Nesti sen, quiciás sía'l momentu de que les corrientes asturianistes que militen y simpaticen con esta fuerza política faigan valir los sos apoyos y sían quien a determinar discursu y acción. D'esta manera, díbemos ver si'l xuegu del PP va en serio o si namás se trata d'ocupar un espaciu vaciu d'idees con persones abellugaes nunes sigles.
Esbilla
del.icio.us
Nun hai comentarios »