Entama'l reconocimientu de la cayida na capacidá de convocatoria del CAO L'ASTURIES LLIBERAL

08/10/2008 GMT 2

Entama'l reconocimientu de la cayida na capacidá de convocatoria del CAO

circululliberal @ 00:42

Les primeres amueses de que'l CAO entama a perder rápido munchos de los sos apoyos van viéndose a modo. Si dende'l mesmu Conceyu se xustificaba la perfloxa asistencia a la manifestación del pasáu sábadu pola mor del "parón estatutariu", ayeri, Xune Elipe, asoleyaba en Les Noticies esa realidá per aciu d'un pequeñu artículu, tituláu 'Debilidá', que reproducimos darréu:

Vivimos un momentu raru, confusu, pal movimientu de reivindicación llingüística. L'amagu de cierre de la reforma estatutaria, con un artículu cuartu pactáu ente PSOE y PP a la baxa, mui a la baxa, dexónos descolocaos, contando con que díbemos tener más tiempu pa organizar la respuesta. Per otru llau'l más que posible pactu de gobiernu ente IX y la FSA sema munches duldes y incertidumes tocántenes a la renuncia de los primeros nel tema de la oficialidá. Y metanes de too ello los militantes pro derechos llingüísticos, organizaos alredor del CAO, con una sensación de derrota apalpable.

La convocatoria de la última manifestación pola oficialidá quedó descontestualizada al tar aparada la reforma estatutaria (paralización que ye de lo poco positivo nesta situación) y na so organización rescamplaron más que nunca les carencies. Nun se foi quien a movilizar nin a los «nuestros», y anque salvamos los trastos (2.000-3.000 persones ye una «mani» decente p'Asturies), nun podemos volver a dar muestres de debilidá asina. Tenemos que pensar enforma los pasos que deamos nel futuru, y replantegar la visibilidá de la reivindicación con formes y maneres más acordies col tiempu actual (tipu la imaxinativa y esitosa campaña de «Doi la cara pola oficialidá»). Salir a la cai nos momentos xustos, meditándolo y depués de «calentar» l'ambiente.