L'ASTURIES LLIBERAL

Con motivu del alderique abiertu dientro del Círculu Lliberal sobre la conveniencia de la permanencia d'ésti nel CAO, plataforma creada col envís de demandar la oficialidá de la llingua, el presidente de la entidá, Humberto Gonzali, remitió-yos esta mañana una carta billingüe a los afiliaos con delles argumentaciones sobre'l tema, tratando asina mesmo otros aspectos como la relación cola política asturiana o la necesidá de meyorar la representatividá na Xunta Directiva. No concerniente a l'asturianu, Gonzali percalca que 'toa postura qu'amuese un camudamientu radical no que yá ye un camín afitáu nunca nun aveza a ser nin entendío nin aconseyable' y que 'si hai coses que nun funcionen afayaízamente nos marcos xunitarios onde tea'l CL, ye preferible abrir canales de comunicación pa tratar d'apurrir igües dende la propia asociación, ensin por ella zarrar dafechu unes posibilidaes que tovía tán ehí'. Na carta afirma que 'la presencia nuna plataforma determinada, y la so permanencia nel tiempu nella, tampoco nun ye torga p'aunise a otra triba iniciatives que sían positives pal futuru de la identidá cultural de nuestro'. Sobre'l marcu llegal de la llingua sentenció 'el Círculu Lliberal tien el compromisu de trabayar, amás de pol espardimientu del pensamientu lliberal nel ámbitu la nuestra cultura, el de trabayar pola oficialidá del asturianu. Nesti últimu aspectu de la nuestra xera, nun hai sitiu nin pa l'ambigüedá nin pal revisionismu; y pa ello l'artículu correspondiente de los estatutos ye bien claru, y si dalguién afayara duldes sobre ello, sedría razonable pidí-y qu'empobinara'l so facer nuna entidá que nun fuera'l Círculu'. Na carta, Gonzali anuncia que cuenta yá cola disponibilidá de causi tola Xunta Directiva pa la so reestructuración inmediato y que 'habra una nueva dirección, más representativa y amplia, que respuenda al notable aumentu d'afiliaciones y pa esplorar nueves víes de trabayu col envís d'afondar na difusión de los principios del lliberalismu históricu'.

Esbilla | del.icio.us