L'ASTURIES LLIBERAL
Bitácora del Círculu Lliberal d'Asturies

La Xunta pola Defensa de la Llingua Asturiana acusa a los colexos concertaos de Xixón, San Vicente de Paúl y L'Asunción, de "impedir la matriculación n'asturianu con amenaces y mentires". D'alcuerdu cola so nota, nel casu del colexu L'Asunción, "dellos familiares d'alumnos ficieron llegar a la Xunta la denuncia de que la direición del centru repartiere unes fueyes onde se pidía espresamente a los pas que renunciaren a les clases d'asturianu non sólo pa esti cursu sinón tamién pa los cursos socesivos". "Con esta política, la escuela incumple tola llexislación vixente pal enseñu del asturianu, que ye clara a la hora d'obligar a ufiertar la matriculación ensin amenaces nin torgues de nenguna clase", añádese. "La fueya unviada p'amedranar a los pas y facelos comprometese contra la llingua asturiana ye un incumplimientu de la llei que tien que tener consecuencies alministratives inmediates", sigue diciéndose. Nel casu del San Vicente de Paúl, "la direición del centru ufierta la posibilidá de matriculación tal y como pide la llei, pero desque hubo abondos pas qu'escoyeron que los sos fíos se matricularen na asignatura, la directora del centru alvirtiólos, mintiendo, contra la matriculación en Llingua Asturiana, afirmando que si asisten a clases d'asturianu pierden una hora de llingua castellana a la selmana", asegúrase nel comunicáu, como tamién se diz que "esta amenaza fixo que los pas de munchos alumnos se volvieren atrás na demanda de matriculación y que los qu'al final siguen cola idea de matriculase s'atopen con que'l centru diz-yos que nun hai abondos matriculaos".