L'ASTURIES LLIBERAL

Un terciu la militancia del Círculu Lliberal pidi la salida del CAO

Dalgo más d'un terciu de los afiliaos al Círculu Lliberal d'Asturies, mayormente de les seiciones de Les Cuenques, pidiéron-y güei a la Xunta Directiva la convocatoria d'un conceyu pa decidir sobre la permanencia nel CAO, asina como pa fixar una fecha pa la cellebración d'una Xunta Xeneral empobinada a l'anovación de la dirección. Los proponentes d'esti tema consideren que'l nivel de parcialidá política d'esta plataforma pola oficialidá ye claru enforma, y que les sos estratexes nun producen avances significativos na defensa de la identidá llingüística asturiana. Per otra parte, dende otres seiciones, n'especial dende Xixón, caltiénse la conveniencia de nun dir a la gueta de xiros bruscos na cuestión de la llingua, mentantu les circunstancies nun obliguen por fuerza a ello. Humberto Gonzali, presidente del Círculu, aconceyó con representantes de les dos postures y aseguró-yos que s'atopará una igua, cola mayor rapidez, a les dos cuestiones que se planteen. D'una parte anuncia, pa la prosima selmana, un dictame sobre la política a aplicar pol Círculu Lliberal nel capítulu d'acciones na estaya de la cultura asturiana. D'otra parte, avanzó que en feches prósimes va facer una propuesta pa l'anovación de la casi totalidá de la Xunta Directiva, col envís d'ufrir representación a les nueves seiciones y la incorporación de persones qu'asumiríen nueves responsabilidaes.

circululliberal @ 12:05

Esbilla | del.icio.us