L'ASTURIES LLIBERAL

Pilar Fernández Pardo presentó una batería preguntes al gobiernu de Zapatero, per aciu la Mesa del Congresu los diputaos, col envís de conocer les xides poles que nel llugar onde debieren tar les dependencies centrales de la Seguridá Social en Xixón namás hai un solar vaciu. Quier tamién la llider del PP xixonés llograr datos rigurosos sobre la fechura y costu de los análisis del sosuelu que se realizaren antes del baltiamientu del anterior edificiu, al igual qu'un compromisu del Gobiernu sobre los plazos d'execución del inmueble.

La Tesorería Xeneral del Estáu contratara a la empresa Alcuba pa perfacer la obra por un montu de 3,8 millones d'euros, una cifra mui per baxo del preciu base de subasta que se fixara daquella en 5,8 millones. Los trabayos pararon la primera vegada n'avientu de 2006, por afayase nel sosuelu problemes que nun se detectaren en nengún de los estudios previos. La situación anguañu ye que ta imposibilitada la construcción de los dos suétanos y crez la tardanza nun proyectu que diba axuntar tolos departamentos de la Seguridá Social agora dispersos pela ciudá.