La direición rexonal del PP ofrez "tol apoyu" a Fernández Pardo frente a los que practiquen el "xuegu suciu" L'ASTURIES LLIBERAL

EP. La direición del PP d'Asturies unvió güei un comunicáu pel que da "tol apoyu" a la presidenta del PP de Xixón, Pilar Fernández Pardo, al grupu de conceyales del partíu nel Ayuntamientu y a la Xunta Llocal del PP de Xixón, frente a los que practiquen el "xuegu suciu cola única pretensión de dañar al Partíu", en referencia a los críticos de Xixón. "Ún d'ellos ta espulsáu del partíu y l'otru con un espediente disciplinariu nel comité rexonal de derechos y garantíes pa la so tramitación", señalaron dende la direición rexonal en rellación a Emilio Noval y Luis de Prado.

D'esta manera, el PP rexonal, presidíu por Ovidio Sánchez, ofreció'l so apoyu a la Xunta Llocal de Xixón una vez que decidiere recurrir la decisión del xulgáu de desestimar la so denuncia poles grabaciones feches públiques pol sector críticu. De fechu, esti mediudía los críticos Emilio Noval y Luis de Prado ofrecieron una rueda de prensa na que señalaron que van aportar más grabaciones.

Sin embargu, la direición rexonal del PP considera que l'únicu fin que persiguen estes persones coles sos continues "falsedaes y inxuries" ye "desacreditar y dañar al PP mediante tolos medios posibles, ensin importa-yos les consecuencies, anque estes seyan favorecer a los adversarios políticos del PP".

El comunicáu, unviáu dende la Direición Rexonal calca en que l'actitú de los autodenominaos críticos ye "propia de la frustración y la impotencia que sufren al nun contar con nengún apoyu nel PP de Xixón" y los convida, a lo cabero, a abandonar "esta actitú testerona que caltienen".

P'acabar, l'escritu de los 'populares' recalcó "l'apoyu del PP d'Asturies a Pilar Fernández Pardo, y a la Xunta Llocal de Xixón, que cuenta con tola nuesa collaboración p'acabar coles actitudes indeseables".

La direición rexonal estudia, de la mesma manera, en casu de qu'estes persones nun cesen na so actitú de "perxudicar los intereses del partíu y de los sos represenantes llexítima y democráticamente elixíos", l'exerciciu de les aiciones a qu'hubiere llugar, "ensin escluyir nenguna, dirixíes a defender la imaxe y intereses del Partíu Popular y los sos integrantes".