L'ASTURIES LLIBERAL

ASTURIES.COM. La Pita de la Xunta pola Defensa de la Llingua Asturiana reapaeció esti martes con motivu del partíu inagural del Campeonatu d'Europa de Hockey sobre patines que ta celebrándose n'Uviéu, y al qu'asistíen el presidente del Principáu d'Asturies, Vicente Álvarez Areces y l'alcalde d'Uviéu, Gabino de Lorenzo. Nos entamos de la ceremonia inagural, el grupu de militantes de la Xunta pola Defensa de la Llingua qu'acompañaben a la Pita dende la grada del Palaciu los Deportes d'Uviéu, entamaron a glayar conseñes en favor de la oficialidá, al tiempu que-y mostraben a los presentes nel palcu pancartes nes que podía lleese: "Esti gobiernu marxina y reprime la llingua asturiana". Dende la organización valoren positivamente una aición que llogró facer "bien visible la reivindicación llingüística nun eventu del máximu nivel deportivu". Asina mesmo repartió ente los medios presentes un comunicáu de prensa nel que xustificaben un actu que buscaba "facer rescamplar la situación gravísima de marxinación y retrocesu que carez una llingua europea, acosada por un gobiernu qu'actua conscientemente pa llograr la so desapaición", polo que nun persiguía "xenerar molesties a la organización del campeonatu". Al alcuentru ente la seleición española y francesa asistieron alredor de 1.500 espectadores, amás de la mentada presencia de políticos y xente del mundu del deporte.

Esbilla | del.icio.us