L'Asturies Lliberal

Publicáu nel so blogue.

Ye ésta una pregunta que faigo davezu cuando-y doi vueltes a la situación de la nuestra llingua, y cuando trato d'entender la postura énte ella de dalgunos compañeros de partíu. Sé que na FSA hai una clara prevención ideolóxica en dientro del grupu dirixente y pola mor d'ello los prexuicios correspondientes. Sé que n'IX les más de les veces la defensa de la llingua ye una pose, por más que bien de militantes d'esa fuerza política crean sinceramente no que dicen. Y sé que nel Partíu Popular nun hai prexuicios nin prevención ideolóxica, más allá de lo que puea pensar un piñu d'afiliaos. Pero nel mio partíu sí tengo detectao un erru que convierte al asturianu nel "paganini" de cuites ayenes. Lo bono ye que nesi erru empérrase mui poca xente cola que comparto sigles. Lo malo ye que los que s'emperren tán no "más granao" de la dirección del partíu o del grupu parlamentariu na Xunta Xeneral del Principáu. Y l'erru nun ye otro que'l poner los intereses d'unos pocos asturianos, ellos, perriba de los intereses de la totalidá de los asturianos. Y metanes esti xuegu, camuden oficialidá por capitalidá. El casu ye que cola capitalidá igual se ganaría un congresu, pero cola capitalidá enxamás se ganaríen unes elecciones. Yo, mire usté per ónde, toi en política pa que'l partíu onde milito gane elecciones.

Esbilla | del.icio.us