L'ASTURIES LLIBERAL

Monasteriu de Valdediós (Villaviciosa), 12 de payares de 2005.

Permítanme comenzar la mio intervención diciendo que me siento afalagada por recibir esti nomamientu de la Fundación Caveda y Nava. L'acoyida que, como Patrona d'Honor, ustedes m'otorguen, supón pa mi una gran satisfación; y tamién, una gran responsabilidá.

Hoi aconceyámonos, ente otres coses, pa cellebrar que tenemos una llingua milenaria, y que tamos dispuestos a trabayar pol so futuru, con tranquilidá, amodo, enfotándonos en que naide se sienta ni discriminaú, ni obligáu, pol so usu. Hoi, quiero facer constar el mio compromisu cola defensa del asturianu; y tamién, el mio compromisu col empléu del diálogu como meyor ferramienta pa la igua de les grandes cuestiones sociales y polítiques. Préstame tar nun actu como ésti, onde persones con diverses formes d'entender Asturies, son pa llevar alantre, a comuña, un esfuerzu pol consensu común en materia llingüística. Sé que m'afayo en mui bona compañía. Nun hai nada más guapo, y yo diría que más patriótico, qu'aunir a los ciudadanos d'un territoriu, piensen éstos como piensen, o falen como falen, na defensa de la so cultura. La capacidá que tienen los pueblos pa trabayar pola conservación, el caltenimientu y la potenciación de la so cultura, de les sos señes d'identidá; diz muncho tamién de la capacidá d'esos pueblos pa llograr progresu y bientar. Asturies, de seguro, podría apurrir muncho d'ello a España. Pero pa poder facelo, tenemos qu'empezar por entendenos ente nosotros. Porque cuando los asturianos ficimos, a lo llargo de la historia, causa común, fuimos quien pa ser importantes nel desarrollu políticu, económicu y social d'España.

Nel tema de la nuestra llingua creo nun m'enquivocar si digo que, tolos presentes, coincidimos na necesidá d'afitar unos mínimos válidos pa toos. Ye bono ser receptivos coles demandes sociales. Ye positivo abrir posibilidaes a los ciudadanos que quieren dignificar el so patrimoniu cultural. Ye democrático dar abellu a les peticiones de reconocimientu de derechos cívicos, cuando éstes se planteen desde la sensatez y el deséu de concordia. Igualmente, nel camín del alcuerdu, sería necesario que la reivindicación de la llingua nun quedara atrapada, en ningún casu, en postulaos que tán mui llueñe de la nuestra realidá social. Nada sería peor pa la llingua qu'algunos, bien dientro d'Asturies, o bien dende fuera d'Asturies, convirtieran a la más sustancial de les nuestres señes d'identidá en motivu de división.

Toles persones que tamos aquí sabemos que diba ser una barbaridá que, por desidia, pudiera perdese la identidá llingüística del Principáu d'Asturies. Tamién sabemos que diba resultar mui grave qu'alguien pudiera tomar la decisión de que la nuestra llingua desapareciera; contra la opinión de los asturianos. Y ye que los asturianos valoren muncho les sos señes d'identidá. Y muestren, con arguyu, la normalidá cola que faen compatible l'asunción de lo propio d'Asturies colo propio del restu d'España. Nun hai ninguna contradición en ser asturianu y al empar español; en defender la llingua asturiana y al  empar la llingua española. Aquí topamos la grandeza de los asturianos. Trabayar polo propio nun ye malo nunca. Y amás, n'Asturies, eso significa enriquecer a la nuestra comunidá al mesmu tiempu qu'a España.

Resúltame mui gratible afirmar, nun marcu históricu tan relevante como ye esti monasteriu de Valdediós, que comparto los fines que la Fundación Caveda y Nava espeya nos sos estatutos. En verdá, ye necesario que na sociedá asturiana cuaye'l sofitu, la estimanza y la defensa de la llingua asturiana. La llingua ye de toos. La llingua ye un bien preciosu del nuestru patrimoniu cultural, y ye imprescindible asegurar la so pervivencia. Pa ello fai falta bona intención, fai falta respetu, fai falta entendimientu. Ye fundamental el diálogu y el consensu. Con diálogu y consensu, y col máximu respetu a la voluntá de los asturianos, podemos dir a la busca d'un marcu llegal propiu, moderáu, progresivu, y que facilite la equiparación llingüística.

Esbilla | del.icio.us