L'ASTURIES LLIBERAL

Ser el Partíu Popular d’Asturies o ser el Partíu Popular n’Asturies. Esi ye’l dilema que va más allá de les últimes declaraciones sobre la llingua asturiana, vinientes del “grupu de trabayu” estraestatutariu que quier encarrilar aína’l prósimu congresu autonómicu del partíu. Y esti dilema ye lo qu’analizó’l Círculu Lliberal d’Asturies, que cuenta ente los sos más de trescientos miembros con bien de militantes del PP asturianu. La xente que formamos esta entidá de promoción del pensamientu lliberal somos asturianos, y asturianistes nel sentíu más abiertu del términu, como somos españoles, y también por qué non españolistes. Tamos mui arguyosos de dambes coses y en bona lóxica tamos igualmente arguyosos de les llingües que se falen na nuestra comunidá autónoma, l’español y l’asturianu (amás de la fala nel estremu occidental). Tamos d’alcuerdu col manifiestu a favor de la llingua común, porque entendemos qu’en delles autonomíes con gobiernos radicales hai una clara imposición de la llingua autóctona sobre’l castellanu, frañendo l’oxetivu democráticu que representa’l verdaderu billingüismu; pero tamién consideramos que la llingua asturiana, la llingua que s’afaya nel legáu históricu familiar de la gran mayoría de los asturianos, sufre una discriminación inxusta ya inconstitucional. Agora mesmo los asturianos que falen asturianu, y que son dellos cientos de miles de ciudadanos,  ven minimizaos o eliminaos  derechos que se reconocen a la totalidá de los españoles na nuestra Constitución. Poro, pensamos que la única igua real pa esta situación d’anacrónicu reduccionismu de llibertaes ye reconocer oficialmente a la llingua asturiana, acordies cola realidá sociollingüística del Principáu d’Asturies y asegurando la llibertá d’usu dende la igualdá de derechos. En virtú d’ello nun somos a comprender que dende nenguna instancia del Partíu Popular pueda facese seguidismu de les postures socialistes sobre la nuestra llingua, d’antiguo  prohibicionistes y asemeyaes a les del peor integrismu idiomáticu del franquismu. Persabemos que lo dicho estos díes nun respuende a nengún alcuerdu tomáu nel pertinente órganu del Partíu Popular, y polo tanto nun ye dalgo firme nin que se pue caltener nos trabayos de la ponencia estatutaria, mentantu nun s’esprese’l Comité Executivu Rexonal del partíu. De toes maneres el dañu ta fechu. Güei la imaxe del Partíu Popular ye la d’una fuerza que furrula como collaboradora del ideariu xacobín de la Federación Socialista Asturiana. Y esta nun ye la imaxe d’un partíu que tendría de facer de contino por ganar elecciones y por llevar a la oposición a una gobernanza socialista que vien siendo’l mayor cáncanu pal desarrollu y progresu d’Asturies. Pa la xente del Círculu Lliberal nun queden duldes sobre la necesidá d’una recondución de la política d’erros y despropósitos, y por ello’l prósimu Crongresu Rexonal va tener una relevancia especial. Ellí decidiráse si habrá o non un Partíu Popular d’Asturies. Ellí sabremos si l’Asturies centrista y moderada va contar coles ferramientes afayaíces pa que’l Partíu Popular gane elecciones.

Esbilla | del.icio.us