Fútbol total
Artículu de Sixto Cortina publicáu nel diariu El Comercio
DAVID VILLA 'El Gua.he' recibe calificativos de toa triba nos alderiques n'Internet non poles coses que ye, dixo o fizo, sinon por ser ún de los xugadores que ganó una Eurocopa de fútbol, un prestosu xuegu que yá ye un xuegu total.
LOS acontecimientos futbolísticos de les últimes selmanes dexen al públicu pingando de sentimientos desemeyaos y a los analistes ablucaos hasta perder la perspectiva, l'arte de representar les coses talo y como se ven y non como quixéremos veles. Como fai falta confesión de parte, primero de nada, reconozo que nun soi futboleru, pero sí que lo fui, que nun veo fútbol namás que cuando nel fútbol se concentra la humanidá entero y que los bilordios de xugadores, entrenadores, propietarios y intermediarios son un arcanu indescifrable pa min. Pero otra cosa ye que l'españíu de colores amariellos y bermeyos diba bien de tiempu que nun se diera per cais, places y fontes, y ello ye que a unos prestó-yos, a otros incordiólos y a los más abultó-yos tan natural como que se mueye'l prau cuando orbaya. L'humor gráficu tamién-y sacó punta a la folixa de depués de cada victoria muncho más qu'al xuegu balompédicu, y los políticos blincaron como sacaveres pa da-y al acontecimientu un aquel patriciu, como si fueren cónsules o senadores convidando a la plebe a unos gayoleros xuegos de cuádrigues. Nada que dicir de la familia real, siempre presente n'acontecimientos colectivos murnios o alegres.
El fútbol total de la selección holandesa facía de cada xugador una pieza que nun quedaba llendada pola so etiqueta y que, como na filosofía empresarial moderna, aprovechaba a cada participante según el momentu y les circunstancies del xuegu y del contrincante. Asina, los acontecimientos deportivos futboleros sirven pa emponderar les causes más desemeyaes, con independencia de la so relación directa o de la incoherencia de facelo con dos o más, de mano, incompatibles ente elles. L'entrenador Rinus Michels llograba asina nel fútbol aprovechar cada momentu y cada xugador en beneficiu del gol que diera la victoria, de la mesma manera que los voceros políticos o mediáticos aprovechen les victories futbolístiques pa encontar o esconsoñar los sentimientos que más convengan en beneficiu propiu. Cualquiera de los héroes españoles de la Eurocopa ye agora representante de sentimientos diversos y contradictorios según la pluma que los empondere, y la fugaz marea de banderes españoles sirve lo mesmo pa un enfotu que pal contrariu, mentanto los sentimientos qu'inspiren cuerren paralelos ensin llegar a rozase enxamás, nin provocar sarapullos nos inocentes romeros que salen a correla.
Hasta les mesmes families sienten desemeyao'l trunfu de la selección española. Al tiempu que parte de la derecha intelectual festexaba l'españíu como amuesa natural de la esistencia d'España, de la qu'ellos deben duldar más que naide, otra, menos intelectual pero con más altavoz, resucitaba el "panem et circenses" y acusa a gobiernos y altes maxistratures del Estáu d'enfilar a los ciudadanos honraos col formientu d'una victoria desconocida pa que nun gorgutasen pola descalabrada situación económica. Al tiempu qu'un cabezaleru del PNV afirmaba qu'él diba con Rusia nes semifinales porque la selección española nun yera la d'él (lo que nun afirmó ye si la d'él yera la rusa), podía vese la nueche de coronación a los bilbaínos de xaréu, mientres xuraben nun ser españoles.
Pa ver hasta qué degoladeru nos lleva esti fútbol total -una semeya quieta y tremenda que nun ye otra cosa qu'una manipulación vergoñosa de los sentimientos naturales y llimpios qu'un xuegu colectivu nos desamarra del interior-, ye abondo con restolar per internet. Si ún busca en foros y alderiques sobre'l xugador asturianu David Villa, verá qué tres coses, que non el xuegu nin los goles, anden de tecláu en tecláu: una, que tuviera un güelu de nome Trotsky, lo que-y supón un aniciu de cuenca minera revolucionaria incuestionable; dos, que delantre d'una cámara de televisión, nes milenta hores de celebración, espetara un «¡Arriba España!» por cuenta del políticamente correctu «¡Viva España!», y tercera, qu'al poco de baxar del avión se dexara fotografiar col cartelu de la campaña 'Yo doi la cara pola oficialidá', lo que lu pon a piques de convertise nun 'asturtxale' dafechu. Ye verdá qu'Internet ye un llugar peligrosu pa pesar los discursos sociales, pero güei ye'l más directu y ye verdá que les tres circunstancies que son pación de blogueros nun son hermanes en categoría: el nome d'un güelu queda fuera de la voluntá personal, un glayíu patrióticu nun define si nun se repite hasta la ronquera y dexase facer una semeya pola oficialidá del asturiano conlleva cierta determinación o voluntá, pero tampoco nun esplica más allá de lo que diz el cartelu. Sicasí, 'El Gua.he' Villa recibe calificativos de comunista, facista y nacionalista nos alderiques de la rede, non poles coses que ye, dixo o fizo, recíbeles por ser ún de los xugadores que ganó una Eurocopa de fútbol, un prestosu xuegu que yá ye un xuegu total.
Esbilla
del.icio.us
El Círculu Lliberal d'Asturies ye un proyectu de calter asociativu asturianista, democráticu y transversal
Home nun taba de más qu'enllazares esos sitios onde dicen eses coses "Sicasí, 'El Gua.he' Villa recibe calificativos de comunista, facista y nacionalista nos alderiques de la rede".
Curiosu | 07-07-2008 - 14:19:52 GMT 2 #