L'ASTURIES LLIBERAL

PSOE ya IU de Xixón acaben de torpedear cualaquier posibilidá d'alcuerdu sobre la ordenanza d'usu la llingua y sobre'l Plan de Normalización, tres recurrir a la mentira col envís de facese autopropaganda. Fai unos díes l'equipu gobiernu de la izquierda presentara una propuesta d'ordenanza municipal y de Plan. La ordenanza de la izquierda constaba d'una esposición de motivos ideoloxizada por demás y un Plan de tan solo 51 medíes, en munchos casos abondo indefiníes. El Grupu Municipal Popular presentó entós 9 enmiendas parciales a la ordenanza, ente otres la que definía al asturianu como llingua propia del conceyu, y una enmienda a la totalidá al Plan, ye dicir, el Partíu Popular presentó una redacción alternativa, un Plan de Normalización Social propiu formáu por 118 medíes, más del doble que les fixaes nel Plan de la izquierda municipal. Les medíes de los populares yeren clares, más avanzaes y con un oxetivu global más ambiciosu, col enfotu de llegar a un real billingüísmu. Esta selmana, dende l'equipu gobiernu fízose la petición de retirada d'esta enmienda a la totalidá al Plan, pa poder llegar al consensu, lo que los populares aceptaron. Alcordóse la formación d'un grupu trabayu, que taría formáu por Jesús Montes Estrada y José Manuel Sariego, de parte l'equipu gobiernu, y por Manuel Pecharromán y Humberto Gonzali, de parte'l Grupu Municipal Popular. Pero depués conocióse que la Gaceta de Gijón, que va distrubuise nel mes de xunetu a 120.000 xixoneses anunciaba, con gran alarde informativu, que "UNA ORDENZA MUNICIPAL REGULA YA EL USO DEL ASTURIANO". Evidentemente cosa tala ye falsa, pues tovía les proyectos d'ordenanza y Plan de Normalización nun llegaron a Plenu, cosa que sucederá nel segundu viernes de xunetu. Pero ye que después ha abrise un plazu d'información público, de trenta díes, onde los ciudadanos puean presentar alegaciones. Tres l'estudiu d'estes alegaciones, llevaráse'l tema otra vegada a Plenu, colo que tanto la ordenanza y el Plan nun podríen ENTRAR EN VIGOR, nel meyor de los casos, hasta setiembre, si bien lo más fácil ye qu'esto pase nel mes d'ochobre. Ante la evidente amuesa de manipulación fecha pol equipu PSOE-IU, esti meudía'l conceyal del PP, Manuel Pecharromán, y l'Asesor del Grupu Municipal Popular de Xixón, Humberto Gonzali, dieron una rueda prensa na Casa Conceyu onde denunciaron esta impresentable mentira de la izquierda gobernante y anunciaron que'l so grupu municipal va caltener les sos enmiendes parciales a la ordenanza y la so enmienda a la totalidá al Plan del asturianu, al tiempu que dexaron bien a les clares la so conderga del emplegu malintencionáu y sectariu de la cuestión llingüística que fain los partíos de la izquierda municipal.

Esbilla | del.icio.us