L'ASTURIES LLIBERAL

Lo d'Asturies nun ye normal. Nun lo ye dende cuantayá. Polo menos dende qu'esti país vieno a tracamundiase nel latifundiu políticu del xacobinismu socialista más gafientu de tol Reinu. Y lo que pasó na facultá de filoloxía de la universidá asturiana nun ye otro qu'una espeyadura de la realidá de nuestro. Lo que pasó ye, tamién, de lo más gratible pa l'actual gobernanza socialista. Una coartada "científica" pal so facer por esboroñar cualaquier futuru dignu que la llingua de los asturianos pudiera llegar a tener. La falcatrúa del grupu enveredáu pol señor Félix Fernández de Castro y López-Patiño, el de les perífrasis verbales, tien l'aliendu del cogollu socialista de Suárez de la Riva. El profesor de les perífrasis verbales, y de poco más, llegó a la xunta de la facultá col envís de facer política, de tresmutase nel valedor de les vieyes esencies centralistes de la doctrina que xurde nel manaderu del socialismu institucional. Y el profesor de les perífrasis verbales, y de poco más, fizo política, fizo lo que fizo porque él nun almite la oficialidá de la llingua. Bien, señor profesor de les perífrasis verbales, y de poco más, pero una facultá de filoloxía ta pa lo que ta, o tendría de tar, que pa la política yá tamos los políticos. La xente asturiano yá nos paga colos sos impuestos a los políticos pa que representemos, a ser posible pa bien, los sos intereses. La xente asturiano nun paga a los profesores, masque sían de les perífrasis verbales, y de poco más, pa que faigan como políticos. Poro, y con tol respetu lo digo, creo que'l  rectoráu tendría d'entamar una nueva votación na xunta la facultá, y una votación que nun fuera secreta. D'esta manera conoceríemos el nome y apellíos d'aquella parte del profesoráu, incluyíu'l de les perífrasis verbales, y poco más, que tien por vezu suplantar a los políticos nel so trabayu. Y ansí lo políticos podríemos facer el nuestru trabayu, fadríemos la política que nos correspuenda, y aconseyaríemos, ente más otres coses, que los profesores-políticos ficieran como nós y sometieran la so permanencia nel puestu a la voluntá de la ciudadanía. Incluyíos, como non, los profesores de les perífrasis verbales, y poco más.

Esbilla | del.icio.us