L'ASTURIES LLIBERAL

El gobiernu socialista de Zapatero recurrió güei, en dellos escenarios, a la represión policial contra los güelguistes del seutor del tresporte y de la pesca. Nos accesos a Madrid, miembros de la Guardia Civil, siguiendo órdenes del ministru d'interior, prindaron a decenes de camioneros y coaccionaron a otros cientos con amenaces de sanción o del usu "ensin contemplaciones" del material antidisturbios. Estes amenaces entamen a espardese per tol estáu. En cuantes al seutor pesqueru, hebo una intervención de la policía contra pescadores y armadores que-y protestaben al "gobiernu de progresu" gallegu de PSOE y BNG, y qu'acabó con dellos ciudadanos contusionaos. En Sevilla, representantes del seutor pesqueru en güelga aconceyaben frente al parlamentu autonómicu, cuando una brutal carga policial ordenada poles autoridaes socialistes provocó dellos firíos. Mentanto ello pasaba, Rodríguez Zapatero refugaba l'usu del términu "crisis" nel senáu, usando una vegada más una "alquimia llingüística" consistente en tratar de tapar la realidá con espresiones inintelixibles. Ante la batería de preguntes, perconcretes, del grupu popular, el dirixente del PSOE dedicóse a char balones fuera, masque pol momentu paez que nun fizo responsable de la situación a les consecuencies de la política imperialista de César Augusto. Al mesmu tiempu, productores de fruta perecedero tiren a la basoria miles de tonelaes de les sos colleches, y en Galicia miles de llitros de lleche acaben en suelu. El IPC amuesa güei una suba espectacular y l'abastecimientu d'alimentos básicos a la población llega a mínimos en partes del territoriu español. Eso sí, tenemos una ministra que, docta ella n'igualdaes, iguará toles malures de la nuestra sociedá incluyendo'l palabru "miembra" nel diccionariu de la RAE, y unos sindicatos de clase normalmente mui llinguateros que lleven meses callaos como un afogáu.

Esbilla | del.icio.us