Después d'un añu llexislatura la política llingüística del gobiernu socialista ye "nada" L'ASTURIES LLIBERAL

Esti añu resúmese na desapaición de retulaciones n'asturianu nos edificios alministrativos, al igual que nos logotipos, o les campañes de calter billingüe. El Plan de Normalización pue dase por muertu, pola mor del so práuticu abandonu. De momentu, la FSA nun s'atreve nin a llevalu a la Xunta Xeneral pa la so valoración. D'otra parte, agravóse la yá de per sí importante precariedá de los Servicios de Normalización Llinguística nel ámbitu municipal. Igualmente, dende la Conseyería d'Educación siguen ensin dar aplicación a la Llei d'Usu. Nun hai espedientes toponímicos nuevos. En xunto, cada día vese más a les clares la intención "lliquidacionista" del gobiernu de la izquierda institucional. L'únicu peligru que se-y presenta nesti momentu a la FSA, y a la so estratexa de desasturianización por desapaición biolóxica de los falantes, ye'l progresivu averamientu del Partíu Popular a posiciones avanzaes na defensa de la realidá llingüística d'Asturies. Nesti aspeutu, l'esmolecimientu de la direición socialista aumenta al tiempu que s'acaben etapes na negociación estatutaria; y sobremanera tarrecen que'l so aisllamientu na cuestión idiomática fuera a xunise cola previsible presión pol desplome de la economía española, lo que-yos podría tornar la situación na nuestra comunidá autónoma nun acosu social de consecuencies eleutorales imprevisibles.