L'ASTURIES LLIBERAL

Publicao en Les Noticies

-Acaben de tener una xunta colos parlamentarios del grupu popular na Xunta Xeneral pa intercambiar opiniones sobre'l tratamientu de la llingua na reforma del estatutu...
-Dende'l CAO lo que vemos ye que'l PP nesti momentu tien una posición abierta. Propúnxonos la redacción d'un modelu de textu pal artículu 4.u pa discutilo y pa falar d'ello. Tán dispuestos nel momentu clave del procesu de reforma a tener un conceyu con nosotros pa da-y vueltes al textu qu'ellos propongan na ponencia. Esto pareznos mui importante, porque'l Partíu Popular ye receptivu y tien consideracion colo que'l CAO representa.

Nosotros hasta-yos propunximos poder sentanos nuna mesma mesa a dialogar col PSOE, IX-Bloque-LV y PP, pa intentar consensuar la redaccion del artículu 4.u. Vemos un posicionamientu abiertu, nun hai nada ciarrao. Nesta reunión, amás, defendimos la voluntariedá contraponiéndola a la obligatoriedá que planteaba la FSA. Lo que tresmitimos ye que la llinia encarnada nun ye la palabra oficialidá nin la obligatoriedá, sinón que lo importante ye la voluntariedá y qu'esa ye la postura que defende'l CAO. Un ciudadanu tien que poder usar la so llingua nel ámbitu priváu: por exemplu, si quier casase nel Conceyu d'Uviéu, que tenga la posibilidá de facelo n'asturianu. O que cualquier ciudadanu pueda facer nuna notaría un documentu redactáu n'asturianu y que tenga tola validez.

Too esto pareció-yos normal na última xunta a los parlamentarios del Partíu Popular asturianu y tán d'alcuerdu con nosotros. Eso ye una actitú positiva.
De toles maneres, en palabres del so portavoz, Joaquín Aréstegui, el PP va mantener una posición propia na ponencia del Estatutu. Tamién Aréstegui reconoz que p'aprobar l'Estatutu fai falta una mayoría de 3/5 y ésta namás se llograría col consensu ente'l Partíu Popular y el Partíu Socialista. Quier dicise, ye como si dixeren que nós tenemos razón y que tán d'alcuerdu colo que dicimos, pero que finalmente van tener que tar un poco a lo que diga'l PSOE. Nosotros dixímos-yos qu'hai que defender los derechos de los ciudadanos y que la posición del PP tien que ser firme, y presentémos-yos dellos casos qu'exemplifiquen la necesidá del reconocimientu xurídicu pa la nuestra llingua, que tien que ser oficial pa que les relaciones ente ciudadanos y alministración pública del Principáu d'Asturies y del Estáu español puedan exercese llibremente en cualquiera de les dos llingües. Tamién tien que ser oficial pa que los falantes d'asturianu tengan igualdá de condiciones colos falantes de cualquier otra llingua del estáu, ensin discriminación nenguna, como fixa'l textu constitucional nel artículu terceru. La tercera y última cuestión ye que cualquier ciudadanu o ciudadana, defendiendo l'usu voluntariu de la llingua nel ámbitu priváu, pueda tramitar textos con validez xurídica.

Esbilla | del.icio.us