El conceyal del Partíu Popular Gabriel Díaz criticó güei que la organización de la Semana Negra xenera empléu "basoria" na ciudá pesie a recibir una subvención añal de 92.700 euros, según los datos de 2007. L'edil indicó que mientres qu'hai por exemplu dos persones que cobren 5.000 euros y otres dos 4.000 euros, hai un total de 69 persones que perciben solo 726 euros. Amás, el conceyal pidió que se xustifiquen los gastos de les perres recibíes con cargu a la subvención y que se-y dea'l mesmu tratu a otres entidaes y organizaciones del conceyu. Nesti sentíu, Gabriel Díaz indicó que'l direutor de la Semana Negra, Paco Ignacio Taibo II, ye un "verdaderu enchufáu" que, "se cree que tien la patente cultural", y al que "nun-y presta debatir temes téunicos pero nun-y fai ascu a recibir dinero". En cuantes a la partida d'ayudes a la contratación, duldó que se puea considerar l'actividá como un yacimientu de trabayu. Tamién apuntó que se tien de formar al personal ente'l 5 y el 11 de xunu y que los contrataos deben pasar previo un procesu de seleición y facer un cursu formación. A esti respeutu, el conceyal manifestó que nel espediente nun se xustifica'l citáu cursu y preguntóse sobre quién ye'l que lu da, ónde figuren los sos sueldos y el control d'asistencia. Poro, instó al Ayuntamientu a comprobar el cumplimientu del conveniu. Gabriel Díaz aseguró que l'equipu de gobiernu de la izquierda da-y "un tratu de favor" a la Semana Negra.
Esbilla
del.icio.us
Nun hai comentarios »