L'ASTURIES LLIBERAL

La presidenta del Partíu Popular per Asturies nel Congresu de los Diputaos, Pilar Fernández Pardo, presentó una proposición non de llei nel Congresu pa reclamar la construición d'un hospital psiquiátricu penitenciariu nes inmediaciones de la cárcele de Villabona, pa dar serviciu a tol noroeste español. La iniciativa foi presentada ayeri en Xixón nuna rueda prensa tres aconceyase con representantes del seutor de prisiones del sindicatu CSI-CSIF.

Pilar Fernández Pardo mentó l'informe que'l sindicatu presentó a tolos partíos políticos nel mes de marzu esponiendo les carencies na atención a presos con malures mentales. Nesti sentíu, Fernández Pardo espón na so proposición el fechu de que les cárceles españoles "convirtiérense en xigantescos centros psiquiátricos hasta'l puntu de que más del 17 per cientu de les persones qu'ingresen nelles tienen antecedentes por trastornos mentales".

Ente los datos aportaos pol Partíu Popular destaca que'l 3,4 per cientu de los reclusos padez un trastornu sicóticu, el 12,28 de calter afeutivu, el 9,4 de personalidá y el 4,2 otra patoloxía. "Esto significa que'l númeru de tratamientos psiquiátricos que se sigue nes cárceles ye mui altu, polo que la salú mental nes prisiones ye, xunto cola masificación, ún de los problemes más importantes del sistema penitenciariu".

Asinamesmo, los centros penitenciarios tornáronse en bona midida, según el PP y CSI-CSIF, en "sustitutivos de les carencies de los sistemes de salú mental nes comunidaes autónomes". Pela so parte, el sindicatu caltién que na prisión de Villabona hai 530 internos con medicación psiquiátrica que tán siendo atendíos na enfermería ensin preparación del personal de vixilancia.

Esbilla | del.icio.us