L'ASTURIES LLIBERAL

Cartelu de la campaña de la izquierda institucional contra'l CUPA

El Conceyu Universitariu pol Asturianu (CUPA) denunció  ''insultos y amenaces'' recibíos metanes el procesu electoral al Claustru de la Universidá d’Uviéu. La organización universitaria fizo públiques les denuncies feches énte la Xunta Electoral, que dirixe'l profesor y militante de la FSA, Leopoldo Tolivar, por esta organización ''pola mor de los fechos asocedíos'' na campaña electoral al Claustru de la Universidá d’Uviéu, que van celebrase esti xueves, 29 de mayu.

La denuncia del CUPA llama l’atención ''sobre la situación d’acosu, insultos y amenaces'' a la que sometieron al candidatu d’esta formación nel Campus del Milán, ''que foi rematada'', esti vienres pasáu cola pegada de falsos cartelos electorales nos que se llanzaben mensaxes ''cola fin de desprestixar a los candidatos del CUPA''. Ente los lemes que pudieron vese esta selmana nes instalaciones de la Universidá apaecen unos cartelos col lema ''Por una misa todos los días en bable en tu Facultad'', nel qu'espeya una clara vinculación con elementos políticos contrarios a la llingua asturiana. Otros lemes emplegaos contra'l CUPA cuestionen la so independencia, o bien traten d'amazcarar la procedencia ideolóxica de los sos creadores, que fontes remanaes pol CL allugaríen na izquierda institucional. Los lemes  ''Demuestra que en el Milán no somos todos unos malditos rojos. Por una candidatura de derechas como Dios manda'' y ''Ya está bien de tanto progre. Por una candidatura de derecha auténtica''  partiríen d'esi entornu nun claru intentu de manipulación al que tan avezada ye cierta progresía. Por embargu, nel campu Mieres esa mázcara nun la emplegaron. Ellí directamente escribieron insultos como "fascistas", en castellano dende llueu. 

Dende la Dirección del Conceyu Universitariu condergaron los fechos y llamentaron ''la falta de cultura democrática de les persones que participen d’esta campaña d’amenaces y desprestixu'', que según comenten ''apecieren nel trescursu de les elecciones a Rector de la Universidá d’Uviéu, momentu nel que yá pudieron vese comportamientos asemeyaos''. El CUPA yá denunciara entós, énte la Xunta Electoral, ''como se repartíen papeletes y se facía campaña nel mesmu día de les elecciones y xunto a les meses electorales, con total impunidá''. El CUPA solidarízase amás con Javier López Espinosa, cabezaleru d’otra de les candidatures presentaes nel Campus del Milán y presidente de l’asociación cultural ''La Brisa de Japón'', que tamién sufrió amenaces del mesmu grupu.

Más información en La Nueva España

Dos universitarios candidatos al claustro denuncian amenazas

Esbilla | del.icio.us