El CAO concentraráse énte la Xunta Xeneral del Principáu coincidiendo cola mesa de la ponencia estatutaria L'ASTURIES LLIBERAL

cao El Conceyu Abiertu pola Oficialidá (CAO) anunció al traviés d'un comunicáu la convocatoria d'una nueva concentración a favor de la reconocencia de la llingua na reforma del Estatutu d'Autonomía. L'actu va tener llugar el prósimu llunes a les 8.30 hores, énte la Xunta Xeneral, coincidiendo col aconceyamientu de la mesa que trabaya na redaición de la ponencia estatutaria. El comunicáu señala que'l CAO "va siguir tolo que dure'l procesu de reforma, pa recordar qu'una parte importante de la sociedá asturiana reclama la oficialidá de la llingua"; "hai que dexar claro d'una vez por toes que dientro del PSOE y dientro del PP hai munchos militantes y dirixentes que tán a favor de la solución que pide'l CAO". Sobre les venideres campañes que fará'l CAO, dientro'l marcu d'aiciones sobre la ponencia estatutaria, señala'l comunicáu que "d'equí a poco vamos presentar delles campañes mediátiques qu'agora tenemos en marcha, y que van valir pa demostrar a les clares cómo la sociedá asturiana ve con bonos güeyos que s'acabe d'una vez cola desigualdá na que viven los nuestros idiomes propios".