La Xunta Pola Defensa de la Llingua define como "demagogu irresponsable" al secretariu d'organización de la FSA
circululliberal @ 22:04
La Xunta pola Defensa de la Llingua llamó güei "demagogu y irresponsable" al secretariu d'organización de la FSA, Jesús Gutiérrez, por comparar la reivindicación de la oficialidá con "creer o non creer en Dios". Al traviés d'un comunicáu, la Xunta afirma que se trata de "una argumentación" propia d'un demente, y entruga a Jesús Gutiérrez si "cree nos derechos de los asturianos o nun cree nellos, y si cree que los falantes de la llingua asturiana tienen de siguir teniendo la suerte de ser ciudadanos de segunda".
De toes formes la mesma Xunta condergara que la llingua tuviera nel centru del debate electoral nes pasaes elecciones xenerales, coincidiendo asina cola mesma posición que'l PSOE. Igualmente, nes elecciones a rector de la Universidá d'Uviéu esta asociación xugó a una supuesta neutralidá, pero que se reflexó tres l'apoyu d'otra asociación a Vicente Gotor. Va poco, un voceru de la Xunta allugaba nun "mesmu nivel d'oposición a la oficialidá" al PP y al PSOE, nunes declaraciones que nun prestaron nada nes agrupaciones más asturianistes del Partíu Popular. Estos fechos, xunto a otros producíos n'otres estayes, lleven provocando bien d'esmolecimientu en dirixentes populares comprometíos cola llingua que pue conducir a un fondu cambiu d'estratexes nel centru derecha asturianu. De fechu, nel últimu Día de les Lletres, notóse l'amenorgamientu de la presencia del PP nel actu de l'Academia de la Llingua; llegando tamién les ausencies significatives a la manifestación previa.
Esbilla
del.icio.us
Comentarios(9) »
borja méndez — 13-05-2008 - 20:13:53 GMT 1
Disculpes, disculpes y más disculpes. La vuestra posición va vese bien ceo, cuando se negocie l'artículu cuartu. Ehí ye onde vamos ver lo que defendeis de verdá y non na turra cirbernético-lliberal que dais un día sí y ortu tamién... nun pongais les tirites enantes de mancavos...
saludinos candiales:)
Triplemente reprimía — 13-05-2008 - 22:03:07 GMT 1
Vaya cara que tienen dalgunos...qué tendrá que ver la Xunta y lo que faiga con dir o nun dir al Actu de l'Academia? Si una ye una institución y otro una organización social...
Balandrán — 13-05-2008 - 22:09:10 GMT 1
Lo de dir más o menos a lo de l'Academia tendrá que ver colo que fai, o nun fai, l'Academia.
Nel post falen Estos fechos, xunto a otros producíos n'otres estayes, lo que paez qu'indica meteúres de pata en dellos sitios, polo menos na Xunta y na Academia, algo debe tar cociéndose...
escayu — 14-05-2008 - 07:15:20 GMT 1
Lo de metedures de pata diraslo tu amiguín, nin la Xunta nin l'Academia tienen porqué trabayar pa ti. La llingua asturiana ye patrimoniu de tolos asturianos, y por eso nun pue ser instrumentalizada por nengún partíu (y menos si tovía sigue en contra de facela oficial).
Si'l PP tien una posición distinta a la del PSOE sobre la oficialidá que lo digan, tiénenlo bien fácil, salen los periódicos tolos díes.
Pel momentu lo que dicen ye que nun tán a favor de la oficialidá (como'l PSOE). Y eso nun ye opinión de la Xunta, ye la cruda realidá.
La Xunta nunca condenaría que la llingua tuviera nel centru de nengún debate electoral, porque si se llegó a eso ye ente otres coses pol trabayu de la Xunta. Lo que la Xunta pue criticar ye la instrumentalización de la reivindicación llingüística nuna campaña electoral. Nun val dicir que se ta pol asturianu cuando se ta en contra de la oficialidá.
Equí ya nun valen engaños y la entruga ye bien fácil: ¿Oficialidá sí o non?.
Un saludu,
Balandrán — 14-05-2008 - 08:49:42 GMT 1
escayu qué guapa ye la demagoxa, pero'l casu ye que la Xunta entama a furrular demasiao mal demasiaes veces.
escayu — 14-05-2008 - 09:23:37 GMT 1
Nada de demagoxa, ¿Oficialidá sí o non?
Un saludu,
Balandrán — 14-05-2008 - 13:29:28 GMT 1
Escayu, tán colgaos dos vidios, unu de Pilar Fernández Pardo, vicepresidenta del PP d'Asturies, y otru d'Humberto Gonzali, miembru del Comité Executivu Rexonal del PP d'Asturies, y que respuenden a la to entruga con un SÍ bien claru. ¿Qué dicen los dirixentes de la FSA del mesmu nivel? Como supongo conoces la respuesta, entós, ¿qué coyones fai la Xunta equiparando al PP cola FSA?
Un saludu
Balandrán — 14-05-2008 - 13:29:31 GMT 1
Escayu, tán colgaos dos vidios, unu de Pilar Fernández Pardo, vicepresidenta del PP d'Asturies, y otru d'Humberto Gonzali, miembru del Comité Executivu Rexonal del PP d'Asturies, y que respuenden a la to entruga con un SÍ bien claru. ¿Qué dicen los dirixentes de la FSA del mesmu nivel? Como supongo conoces la respuesta, entós, ¿qué coyones fai la Xunta equiparando al PP cola FSA?
Un saludu
escayu — 14-05-2008 - 14:07:57 GMT 1
Balandrán, primero de nada quiero dicite que les persones que nel PP tán trabayando na defensa de la oficialidá merécenme tol respetu y apreciu. Pero tu sabes perféctamente qu'esos posicionamientos puntuales nun tán asumíos tovía pol partíu.
Posicionamientos d'esi tipu tenémoslos vistos tamién na FSA (Trevín, Hugo Morán...) ¿y qué? ¿ónde queden a la hora la verdá?.
Tamos ente una reforma del estatutu na que se va decidir esta cuestión ¿qué va facer el PSOE? ¿qué va facer el PP?
La Xunta, y el restu del movimientu de reivindicación llingüística, pide a los dos partíos que pel momentu tienen una posición pública contraria a la oficialidá que modifiquen la so postura y la incluyan nel estatutu. Nun me paez qu'eso sea una equiparación intolerable, simplemente ye lo qu'hai.
Dexar un comentariu