ELECCIONES MUNICIPALES N'INGLATERRA Y GALES: Batacazu históricu del socialismu británicu, victoria conservadora y avance de los lliberales demócrates
El primer ministru británicu almitió el "decepcionante" resultáu nos comicios. Dende Downing Street díxose que'l Partíu Llaborista (socialistes británicos) "reflesionará" sobre lo que pasó. El llaborismu gobernante sufrió un batacazu nes elecciones municipales cellebraes n'Inglaterra y Gales y podría quedar en tercer llugar, tres de conservadores y lliberales demócrates. Ye'l peor resultáu electoral pal partíu de Gordon Brown dende los años sesenta. A falta de los datos de Llondres, y de dellos conceyos menos importantes, los llaboristes llogren solo'l 24% de los votos emitíos frente a un 44% del Partíu Conservador y un 25% del Partíu Lliberal Demócrata. El batacazu aseméyase al que sufrió en 1995 el conservador John Major, que dos años más tarde perdería'l poder al derrotalu Tony Blair. Con estos resultaos afítase'l cambiu de signu electoral en tol continente, al tiempu qu'España queda cuasi como una islla de socialismu en dientro d'una Europa que refuga da-y gobiernos a la izquierda.
Esbilla
del.icio.us
Namás un apunte llingüisticu p'abrir l'alderique, ¿por qué hai esi vezu de poner "elecciones" cuando l'ALLA encamienta l'emplegu d'"eleición" y derivaos? Ye que toi fartu de lleelu nos medios y peme que soi l'unicu fatín que sigue lo que diz el diccionariu.
Vity | 02-05-2008 - 20:53:54 GMT 1 #
Vity, l'Academia almite les dos soluciones a los grupos consonánticos cultos. Nel so diccionariu toparás los dos términos, elección y eleición. Los dos son correchos y mentantu nun cambie'l tema, cada usuariu de la llingua ye llibre d'escoyer ente dos opciones. De fechu, ente les persones que redacten los posts d'esti blogue hai quien prefier una solución o otra. Nun ye raro topar, pongamos por casu, nun post redaición y n'otru redacción. Asina que, nosotros, nesta cuestión somos partidarios de la llibertá d'usu. Otro sedría si más alantre l'Academia determina que solo pueda haber una opción, seya la que seya. De toles formes nun yes l'únicu que sigue la forma que tu tienes escoyío. El porcentaxe d'emplegu d'una solución o otra son abondo parexos.
Círculu Lliberal | 02-05-2008 - 21:16:56 GMT 1 #
Pues entós foi error miu, pensé que la forma encamentada yera la d'eleición al ser a la que remite si se busca "elección".
http://www.academiadelallingua.com/diccionariu/index.php?cod=18072
Vity | 02-05-2008 - 21:20:59 GMT 1 #
Nel diccionariu tien preferencia la forma eleición, pero l'Academia almite les dos. Ver GRAMÁTICA DE LA LLINGUA ASTURIANA, IV, 4.7 Adautación de -c final de sílaba, puntu b ), onde topes el casu del que falamos
Círculu Lliberal | 02-05-2008 - 21:38:35 GMT 1 #