Leopoldo Tolivar Alas: "si'l PP garra una posición mui asturianista dalgo va tener que movese'l PSOE" L'ASTURIES LLIBERAL

Publicao en Les Noticies

Tocó-y nesos informes falar del estatus de la llingua asturiana. ¿Decántase por dalguna de les opciones qu'apuntaba?

Colos años cada vez me faigo más pragmáticu y pienso que d'una parte'l PSOE va movese poco y la incógnita ye saber hasta ónde va llegar l'escorzu que fixo'l PP nes últimes elecciones y hasta qué puntu eso va condicionar los pactos; si'l PP garra una posición mui asturianista dalgo va tener que movese'l PSOE del so mensaxe oficial de la potenciación del asturianu sin una modificación sustancial del artículu 4 del Estatutu. Nel PP sintióse falar d'una cooficialidá non impuesta, anque la cooficialidá bien entendida tampoco nun supón una imposición. D'otra parte la voluntariedá nel aprendizaxe qu'aparez nel artículu 4 del Estatutu nun tien exemplos nel derechu comparáu. N'Italia hai rexones onde una llingua o un dialectu non oficiales son d'estudiu obligatoriu en cuantes que llingua materna. Nun ye un dogma eso de qu'oficialidá y obligatoriedá tengan una unión perfecta: pueden dase tolos modelos posibles. Ye decisión del lexislador, de los dos partíos mayoritarios, hasta ónde llegar.