¿Hai una parte del asturianismu que refuga'l nomamientu de Berta Piñán como académica de númberu? L'Asturies Lliberal

Unu de los argumentos del FORU LLIBERAL, Berta Piñán na Academia la Llingua, anició con delles entraes onde se reflexa una división d'opiniones sobre la conveniencia de que l'autora canguesa sía académica de númberu na ALLA, si bien nun sabemos si tamos énte un alderique qu'amuesa un descontentu considerable con esta decisión o énte un piñu posicionamientos poco significativos. El casu ye que na próxima xunta estraordinaria de la institución, que va facese’l vienres 9 de mayu con motivu del Día de les Lletres Asturianes, va nomase a Berta Piñán miembru de númberu de la institución. Esta muyer ye una de les escritores asturianes de la llamada segunda promoción del Surdimientu, conocida a partir de 1986 con un llibru de poemes, «Al abellu de les besties»; esti primer llibru, que llograra daquella’l Premiu de Poesía de l’Academia de la Llingua Asturiana, abrió les puertes a una producción poética con otros llibros como «Vida privada», col qu’obtién en 1990 el Premiu Teodoro Cuesta que concede’l Conceyu de Mieres, y más recién «Temporada de pesca« y «Un mes». Traducida al catalán, Berta Piñán tamién escribió obrines de lliteratura infantil, n’asturianu y en castellanu.