Aconceyamientu de Xuristes pol Asturianu refuga les declaraciones gallegues d'Álvarez Areces L'ASTURIES LLIBERAL

Énte les llamentables manifestaciones feches por señor Areces en Galicia, l’Aconceyamientu de Xuristes pol Asturianu vese nel casu de refierta-y a la ciudadanía asturiana que:
   1. L’emplegu públicu de la llingua propia ta proclamáu pela Organización de les Naciones Xuníes y el Conseyu d’Europa como drechu humanu imprescriptible ya independiente dafechu de les mayoríes polítiques de gobiernu.
   2. Tolos poderes públicos tan obligaos a cumplir bonalmente l’ordenamientu xurídicu (nesti casu la Carta Europea de les Llingües Rexonales o Minoritaries y la Llei 1/1998, d’usu y promoción del bable/asturianu) y los pautos que roblen (Plan pa la normalización social del asturianu, 2005-2007), al marxe de les sos comenencies.
   3. Pa saber cuala ye la opinión d’un pueblu hai que-y la entrugar primero. Poro, si’l señor Areces nun cree no que dicen les encuestes sociollingüístiques -que los más de los ciudadanos tan porque la asturiana tenga un tratu asemeyáu al que reciben les otres llingües rexonales españoles- que convoque un referendum pa salir de duldes. Mentantu, nun tien drechu a sofitase nel cargu pa espardir perdayuri que les sos zunes o rensíes escontra’l más importante signu identitariu del país son compartíes pola mayoría de los asturianos.
   4. El nome de la Ría del Eo; la colonización televisiva gallega del occidente d’Asturies; y les iniciatives parllamentaries a la gueta de la declaración d’oficialidá de la llingua gallega na fastera Navia-Eo, son problemes de presente y de futuru que meriten daqué más del minutu que’l señor Areces diz que nun quiso da-yos nel so alcuentru institucional col presidente de la Xunta de Galicia.
   Pola Xunta Direutiva del Aconceyamientu de Xuristes pol Asturianu robla el so secretariu,
Xurde Blanco Puente