Pilar Fernández Pardo refugó l'equipu de trabayu d'Ovidio Sánchez
La presidenta del PP de Xixón, Pilar Fernández Pardo, amuesó güei públicamente'l so refugamientu al equipu de trabayu designáu pol presidente del PP d'Asturies, Ovidio Sánchez, tres les últimes elecciones xenerales, pa facer trabayos previos a los congresos nacional y rexonal. El grupu ta encabezáu por Joaquín Aréstegui, Fernando Goñi y Agustín Iglesias Caunedo.
La intervención de Fernández Pardo se produxo nel marcu del aconceyamientu estraordinariu del Comité Executivu Rexonal que tuvo llugar güei n'Uviéu. Na mesma llinia que Fernández Pardo mostráronse otros dirixentes. La presidenta del partíu en Xixón, y vicepresidenta del PP asturianu, foi mui clara y especialmente tayante nel momentu d'esponer los sos argumentos. "Ni estuve, ni estoy, ni estaré en ese grupo", espetó-y la llider popular a Ovidio Sánchez. Amás, Pardo espresó la so opinión negativa sobre esa triba d'estructures y dixo que les cuestiones que tienen de ver cola acción del PP n'Asturies, incluyíes les relatives a la reforma estatutaria, la oficialidá de la llingua o los presupuestos, tienen de decidise "dentro de los órganos del partido" y non fuera. Xixón tuvo un pesu perimportante nel conceyu d'esta mañana, onde nel mesmu sentíu que Fernández Pardo falaron dellos miembros de la so xunta local.
Tamién, les crítiques a esi grupu de trabayu ficiéronse dende representantes d'otres xuntes, que llegaron a denomala "estructura paralela" o "triunvirato de sabios". La reunión foi especialmente tensa con numberoses intervenciones. Manuel Rodríguez, de Cangas del Narcea, reivindicó'l papel de la secretaría xeneral del partíu, dirixida por Reinerio Álvarez. El secretariu d'área de conceyos de baxa densidá, Felipe Díaz Miranda, pidió respetu a los órganos que dirixen el PP y la convocatoria normal de xuntes directives y comités pa dialogar dientro del partíu. Especialmente sonáu foi'l falamientu del secretariu xeneral, Reinerio Álvarez, que dixo que'l mayor patrimoniu yeren les xuntes locales y los sos presidentes, cargando amás contra Aréstegui. Dixo que los aconceyamientos fechos pol mencionáu grupu de trabayu cellebrárense ensin la presencia del secretariu xeneral, nin d'otros dirixentes del partíu n'Asturies. Asina, refugó esa dinámica, apoyó a Pilar Fernández Pardo y consideró negativa la formación d'otros órganos. El presidente del PP de Mieres, José Coto, defendió la so xestión y criticó les filtraciones feches por delles persones del so propiu partíu pa engochar la so imaxe, lo que tildó d'asqueroso. Igual qu'otros intervinientes, refugó que s'intenten acallar les propuestes de renovación.
Esbilla
del.icio.us
El Círculu Lliberal d'Asturies ye un proyectu de calter asociativu asturianista, democráticu y transversal
Nesta noticia diz lo mesmo, pero ensin poner "oficialidá" delantre de llingua.
http://www.elcomerciodigital.com/gijon/20080411/politica/gijon-rechaza-organo-paralelo-20080411.html
Vity | 11-04-2008 - 23:32:51 GMT 1 #
Saltareisme enriba como siempre, pero creo que yá queda nidio que quereis o bien convencevos a vosostros mesmos que la oficialidá ta dada yá o facer que lo creamos nós, porque sinón nun m'esplico esa zuna d'amestar coses que nun se dixeron.
Vity | 11-04-2008 - 23:39:31 GMT 1 #
Nun ye por saltar enriba naide Vity pero la mención de la oficialidá fízose. Sabémoslo por persones que tuvieron nesi Comité. Lo que ficimos ye complementar la información d'axencia, que yera correcha, con esti datu que nun saliera n'otros medios. Y en tou casu si se faló d'oficialidá foi pa indicar que nesi tema, como nos que tamién se mencionen, tienen de ser los órganos definíos nos estatutos del PP los que decidan les postures oficiales. Nesti blogue nun tratamos de convencenos de nada. La realidá ye que la cuestión llingüística ye un tema de debate importante nel PP y que munches xuntes locales d'esti partíu quieren que se defina la postura onde correspuende, torgando que naide pueda imponer una posición que nun tea avalada nin pol Comité Executivu nin pola Xunta Directiva Rexonal. Comprenderás que podamos dicir que tenemos accesu a unes bones fontes d'información. Y poro facemos esta puntualización que d'otra manera ye importante pa entender como se mueven les coses en dientro del PP asturianu.
Circululliberal | 12-04-2008 - 00:20:24 GMT 1 #
Pero entós nun pongáis la noticia y la fonte como si fuere lliteral. La meyor forma de facer que la xente garre repunancia ye tratalo de bobo, y vosotros facéislo de siguío con estes coses.
llomba | 12-04-2008 - 12:41:08 GMT 1 #
(quiero dicir, que nun garréis la noticia lliteralmente d'un mediu de comunicación y la camudéis al vuestru gustu)
llomba | 12-04-2008 - 12:42:07 GMT 1 #
Coño llomba, tán diciéndote que completen la noticia d'axencia con un datu perimportante pal asturianismu, que ye lo relativo a la oficialidá, y ya tamos dando-y vueltes a les coses. Si ésti datu nun sal nes axencies y nesti blogue lu saben, ¿qué quies, que nun lu den? ¿Paezte mal que te den más información? Sois la hostia. ¡Como nun vamos tar como tamos!
Nel Coto | 12-04-2008 - 13:33:50 GMT 1 #
Y por cierto, llomba, la noticia que lliteralmente mangaron nesti blogue ye la que publicó Europa Press. Tomáronla d'una axencia de noticies, lo mesmo que fizo El Comercio, cola salvedá de que'l datu sobre la oficialidá nun lu publicaron, pero parez que n'Asturies Lliberal sí lu sabíen per vía d'algunos asistentes. Cosa normal, porque nel Círculu Lliberal, qu'asoleya'l blogue, hai dellos miembros que militen nel PP. Torno a decilo. Parez mentira que vos paeza mal que vos deen información más completa, y sobre too cuando ésta ye sobre la nuesa llingua. Parez qu'importen más los vuesos prexuicios ideolóxicos que los avances na defensa de la nuesa llingua.
Nel Coto | 12-04-2008 - 13:42:00 GMT 1 #
Non Nel, nun t'equivoques. Yo prexuiciu idiolóxicu nengunu, hai xente nel Círculu Lliberal que me merez tol respetu. Lo que pasa ye que, na sociedá de la información d'anguaño, estes coses tienen un nome: manipulación. Ta feo camudar el trabayu nun creáu por ún mesmu pa da-y un envís pa que paeza meyor. Vosotros garrastis esi vezu. Si uses la noticia que da una fonte, cites la fonte ensin manipular lo que diz la fonte. Y si quies amestar el to puntu de vista o los tos datos a una información ayena, fáeslo coles tos propies frases y diciendo que lo tas faciendo. Vamos, ye que ye de sentíu común...
llomba | 12-04-2008 - 20:41:02 GMT 1 #
Tas diciendo que añadir un datu importante ye manipulación. El Comercio y La Nueva España, por poner unos exemplos, tamién garraron una nueva d'axencia y pusieron después bien poco de la so collecha. ¿Tamién manipulen?. ¿O ye que'l datu qu'aporta esti blogue nun ye interesante? En tou casi aquí sabemos qu'hai dos fontes, una noticia d'axencia, y unes persones que dicen que cuando se faló del asturianu, discutióse sobre la oficialidá. Pero bien, yo sí comprobé que tolo dicho nesti blogue después acabó confirmándose. Si tu ves manipulación, cuando afirmes eso, yo sigo viendo prexuiciu ideolóxicu. Puedo equivocame, como non, pero nun entiendo l'alderique.
Nel Coto | 12-04-2008 - 23:07:19 GMT 1 #
Por supuesto qu'El Comercio y La Nueva España tan manipulando la información cuando faen eso.
Trátase namás que de tener postura y hixene comunicativo.
llomba | 13-04-2008 - 08:46:30 GMT 1 #
¿De qué tais discutiendo equí?. Xesucristu fartucóse de poner la otra mexella y acabó crucificáu. Si añadir información ye xugar puerco, pues ¡viva'l xuegu puercu!. L'entramáu políticu, sindical, comunicativu, etc. que tán mangoniando Asturies, ¿qué tán xugando llimpio, ho?. Por favor...
El xanu\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\ | 13-04-2008 - 13:36:36 GMT 1 #