El Círculu Lliberal d'Asturies ye un proyectu de calter asociativu asturianista, democráticu y transversal
Publicao en Les Noticies
-La Fundación Caveda y Nava reunióse, nuna segunda ronda, col PP. ¿Qué impresiones tenéis?
Trátase de continuar cola ronda qu'estableciéramos enantes de les elecciones. La idea ye falar con tolos partíos parlamentarios, polo menos colos que nos reciba. Nesti momentu yá hai que concretar les propuestes de redacción del Estatutu y nós lo que fiximos foi ponenos a disposición de toos p'atopar una salida digna pal estatus del asturianu dientro del Estatutu.
La Fundación Caveda y Nava defende la oficialidá. ¿Topastis receptividá nel sen del PP?
Joaquís Aréstegui, la persona del PP cola que nos reunimos, yá fixo declaraciones públiques nes que dicía que'l PP nun refugaba la idea de la oficialidá siempre y cuando nun implicara obligatoriedá. Nós propunxímos-y fórmules qu'encaxen nestos límites y, nesti sen, el PP nun pon especial oxección a la oficialidá, si bien ye mui consciente de los problemes debíos a la posición que tienen otros grupos parlamentarios.
Tengo entendío que falastis de los usos oficiales qu'ha tener l'asturianu, quier dicise, la fórmula de la oficialidá a l'asturiana.
Sí. Al filo de les reformes que se fixeron n'Aragón y en Castiella y Llion tán planteándose otres formes de tratar les llingües. Nesti sen, el contextu ye cada vez más abiertu. De lo que se trata ye de que se reconozan, polo menos, tres coses básiques: que se defina nel Estatutu que l'asturianu ye una llingua, acabando coles ambigüedaes qu'hai agora (bables, variantes, modalidaes llingüístiques...); un puntu básicu diba ser el derechu a usar la llingua nel ámbitu públicu y nel priváu, y que naide pueda ser discrimináu en razón al usu de nenguna llingua; y el tercer llugar, que se regule por medio de lleis existentes o otres que se faigan la garantía de la enseñanza a tolos niveles, sobre la base de la llibre elección, y que s'exprese'l compromisu cola promoción d'unes llingües (l'asturianu y el gallegu-asturianu) que, como minoritaries que son, tán en riesgu de desaparición. Esi ye'l minimum al que nun se puede renunciar; cualesquier cosa per baxo d'esto ye dar pasos atrás.
¿Barrunten na Fundación que nun s'acepte esti minimum?
Puede suceder que nun se toque l'artículu 4; personalmente pienso que diba ser un error. Ye un artículu que quedó vieyu, que se contradiz colo que diz la Llei d'Usu y Promoción... Otramanera, ta'l marcu européu -y nun toi falando a cencielles de la Carta Europea de Llingües Rexonales, sinón de la Carta Europea de Derechos Fundamentales, onde se diz que naide va ser discrimináu por razón de fala. Nun vamos a ser la excepción n'Europa. Nun creo que pueda dase un retrocesu, máxime cuando l'asturianu yá ta reconocíu indirectamente pol Estáu cola Carta que suscribió de les Llingües Rexonales.
Esbilla
del.icio.us
Facer cita, como fai José Manuel Pérez de los Estatutos d'Aragón y de Castiella y Lleón nun se si ye un intentu de solucionar el problema o d'estropialu una migaya más. En ningún d'estos estatutos se reconoz oficial a otra llingua que nun seya el castellán. Nun paez que pal casu asturianu seyan modelu dengún d'avance sinon tolo contrario y nun recoyería lo manifestao nin por Fernández Pardo nin por Joaquín Arestegui de reconocencia de la oficialidá y espero que la Fundación Caveda y Nava nun defenda nin estes posiciones nin les declaraciones de Jose Manuel Pérez. Decir a estes altures quel asturianu ye una "llingua minoritaria" n'Asturies, denota a lo menos, desconocimientu, ya que toos sabemos que la llingua emplégase mayoritariamente nel ámbetu familiar y priváu y non nel públicu per la falta de rangu oficial y'l consiguiente "miéu social".
Nun veo claru l'interés que pal periódicu Les Noticies tien la publicación de esta entrevista col Sr. José Manuel Pérez. Tiempu habrá.
A ver si resulta que los de la Caveda y Nava son menos ambiciosos que'l PP na defensa la llingua. Nun sé, nun sé...