L'ASTURIES LLIBERAL
Bitácora del Círculu Lliberal d'Asturies

Nuna rueda prensa, la presidenta de l'Academia, Ana Cano, dio anuncia de la puesta en funcionamientu d'esti serviciu. La forma d'utilización esplicóla Fernando de la Fuente, representante de la empresa de servicios informáticos Araz Net, encargada de la ellaboración d'esta versión informática.

   El sitiu web de l'Academia presenta un 'banner' con títulu 'Diccionariu de la Llingua Asturiana' (Dalla). Basta calcar nél y ábrese la ventana del serviciu, que muestra un recuadru nel que s'introduz el términu a buscar. Una vez escrita la pallabra, cálcase col cursor en 'Faer consulta' y apaez darréu la definición de la mesma, tal y como figura na versión en papel del Dalla.

   En casu de que la grafía del términu nun coincida exactamente cola pallabra que vien nel diccionariu, esti serviciu 'on line' ofrez una serie de suxerencies pa que l'usuariu escueya la que más s'axuste al términu buscáu.

   La puesta en marcha d'esti catálogu léxicu vien acompañada de la presentación también de la versión 'on line' de la última revisión de les normes ortográfiques y la gramática oficial de la llingua asturiana. Amás, la presidenta informó de l'actualización del 'Iguador', el corrector ortográficu que se pue descargar dende la páxina de l'Academia, y que ya ta adautáu pa les últimes versiones del sistema operativu Windows.