L'ASTURIES LLIBERAL

Talu que ficiera nos Decretos que regulen la enseñanza primaria y secundaria y nel proyeutu pa educación infantil, el gobiernu del Principáu d'Asturies presenta un proyeutu pal bachilleratu qu'incumple los mandaos de la Carta Europea de les Llingües Rexonales o Minoritaries (ratificada por España nel añu 2001, BOE de 15 de setiembre) y de la Llei del Principáu d'Asturies 1/1998, d'usu y promoción del Bable/Asturianu. Poro, venimos presentar les alegaciones darréu:   

AL SR. D. JOSÉ LUIS IGLESIAS RIOPEDRE, CONSEYERU D’EDUCACIÓN Y CIENCIA. 

  

Xurde Blanco Puente, con DNI ... y domiciliu a efeutos de notificaciones n’Uviéu (33001), cai ..., na so condición de Secretariu del Aconceyamientu de Xuristes pol Asturianu persónase y DIZ:

   Qu’en conceyu cellebráu al efeutu, la Xunta Direutiva de la mentada asociación apautó empobina-y l’escritu que sigue darréu:

   “Señor Conseyeru:

   El so proyeutu de Decretu d’ordenación y curriculu del bachilleratu asoleyáu’l día 10 de marzu na páxina web de la Conseyería d’Educación y Ciencia, contradiz en dos perimportantes cuestiones a normes de rangu superior.

   Asina, cuando a la llingua asturiana-y niega otra condición que nun seya la de materia optativa, ta incumpliendo l’artículu 8.1.c) de la Carta Europea de les Llingües Rexonales o Minoritaries,  yá qu’España, acordies col so instrumentu de ratificación, comprometióse nella a “disponer los medios pa una enseñanza secundaria  garantizada nes llingües rexonales o minoritaries correspondientes”, pente elles “les que los Estatutos d’Autonomía protexen y amparen nos territorios onde tradicionalmente se falen”, como ye’l casu de l’asturiana (artículu 4 de la Llei Orgánica 7/1981, del Estatutu d’Autonomía d’Asturies). Pero, ¿ónde s’atopa nel mentáu proyeutu de Decretu tala previsión d’emplegu vehicular de la llingua asturiana nel bachilleratu?. Al empar, camuda en lletra muerto el mandáu de que “El Principáu d’Asturies, nel exerciciu de les sos competencies… promoverá’l so usu dientro del sistema educativu”, conteníu nel artículu 9, de la Llei Autonómica 1/1998. Porque ¿qué usu de la llingua asturiana va promover si nun se disponen los medios pal so emplegu vehicular na enseñanza?. ¿Cómo se pue promover l’usu d’una cosa impidiendo usala?.

   D’otra miente, nel artículu 9.4 del proyeutu la llibertá d’eleición de la materia optativa Llingua Asturiana y Lliteratura (¿lliteratura d’ónde?) pol alumnáu ye una reconocencia tramposa porque a los estudiantes de ná-yos va valir escoyela si a criteriu de la Conseyería los que lo faigan son un “númberu insuficiente d’alumnos y/o alumnes pa constituyir un grupu”, arbitrariedá  qu’esfraya escontra‘l mandáu al Principáu d’Asturies conteníu nos artículos 9 y 10 de la mentada Llei 1/1998, nel sen de que “asegurará” y “garantizará la enseñanza del bable/asturiano en tolos niveles y grados”, ensin torga dala de númberu nin sometimientu a los petites (“criterios oxetivos” los llama’l proyeutu) de dengún políticu.

   Poro, talu que ficimos énte’l proyeutu de curriculu d’educación infantil, dende l’Aconceyamientu de Xuristes pol Asturianu encamentámos-y acatu y respetu a la lliteralidá, espíritu y finalidá de la Carta Europea de les Llingües Rexonales o Minoritaries y a la Llei 1/1998, d’usu y promoción del bable/asturianu.

   N’Uviéu, a venticuatro díes andaos del mes de marzu de dos mil ocho”.

   Cumple col mandáu de presentación, rexistru y espardimientu, el secretariu. 

   Robla: Xurde Blanco Puente

Esbilla | del.icio.us