L'Asturies Lliberal

Reproducimos dalgunes de les reacciones al posicionamietu favoratible a la oficialidá fechu por Pilar Fernández Pardo nel programa La lupa, y qu'apaecen en blogues escritos n'asturianu.

Atlantic prau

5/03/08

Pilar Fernández Pardo (PP): Respeuto a la llingua tenemos el mesmu discursu n'Asturies qu'en Cataluña.

El programa La Lupa na Canal 10 de Xixón entrevistó esti martes día 4 a Pilar Fernández Pardo, candidata al Congresu pol Partíu Popular y presidenta d'esti partíu en Xixón. Tamién ye Patrona d'Honor de la Fundación Caveda y Nava.

Les sos declaraciones espeyen lo que puede ser a partir d'agora el puntu de partida del Partíu Popular en materia llingüistica pala reforma del Estatutu d'Autonomía, y son les que vienen darréu:

• El que quiera falar o escribir n'asturianu lo mesmo nel ámbetu oficial que nel priváu tien que lo poder facer llibremente.

• Hai que posibilitar l'ensiñu y l'emplegu de la llingua pero ensin obligar a naide.

• Si un xuez quier facer usu de la llingua nes sos sentencies o un ciudadán ante les alministraciones tienen que poder facelo, toos entendemos perfechamente l'asturianu, pa mín que nun diben facer falta traductores, pero si tien qu'habelos...

• La oficialidá tien que dir nel Estatutu y la ponencia creada na Xunta Xeneral pa la so reforma ye onde los partíos políticos tienen que falar nidiamente de lo que quieren pal futuru y nesti sen la llingua ye un finxu fundamental.

• Esti ye'l mesmu discursu que tenemos en Galicia, en Valencia, onde falen gallegu y valencián, o en Mallorca o en Cataluña, nun ye contrariu al discursu del PP.

 Fueya en blancu

¿LES IDEES CLARES?

Dende qu'entamó la campaña, al traviés del candidatu del Partíu Popular n'Asturies, vieronse dellos guiños al asturianu (siempre pa facer risión) que yeren los habituales de Gabino de Lorenzo. Dende'l blogue de "L'Asturies Lliberal" allababen esos xestos y como yera lo normal tolos votantes nacionalistes d'izquierdes vimos que nun yera nada nuevo y que taba faciendo lo de siempre, populismu.

Pero la bola empecipió a medrar, entró en xuegu'l PSOE pidiendo que retiraren l'asturianu de la campaña eleutoral (como si tuvieren poder pa decidir qué temes son los que-yos interen a los asturianos) y Gabino siguió erre qu'erre cola so defensa llingüistica, a la que se sumó xente como'l sobrín de la "Tía Nemesia" y Pilar Fernández que yá amosara cierta consideración pa col asturianu al facer un casoriu na llingua de nueso nel conceyu de Xixón y al tar na fundación Caveda y Nava. Agora tamos nel puntu de que polo vistu hasta les NN.GG (Mocedaes del PP), y quiero aclarar; siempre en campaña, tán saliendo a la defensa de la "oficialidá ensin obligatoriedá/imposición", amás d'abondos representantes d'esti partíu. Y entrúgome yo...¿Porqué agora?

Va unos meses les declaraciones por parte de cabezaleros del partíu como Ovidio yeren clares "la llende ye la oficialidá", ¿porqué agora si se pue trespasar esa llende?, ¿porque tamos n'eleiciones?: si, pue ser, foi lo que pensamos toos nun entamu y lo que la mayoría piensen agora, pero si nun ye asina la otra opción ye que dende dientro al traviés d'asturianistes de dereches, como Humberto Gonzali, algamose un cambeu d'opinión de cara al estatutu.

Si ye asina, el PP y IX xuntos, arrequexarien al PSOE nesti tema y sacaríenlo adelantre, tendríemos de xuru una oficialidá feble, la más feble del estáu pero tendriemos dao tamién un reblagu perimportante na defensa de la llingua. Y digo tenemos porque si dalgún día llega la oficialidá, nun va ser gracies al PP nin a IX, sinón al movimientu social que lluchó demientres 30 años, de forma pacífica, por esa reconocencia. Movimientu qu'aguantó lo indecible; argumentos de lo más mazcayo "nun ye llingua, onde vais, nun lo fala naide, quereis imponer un asturianu de llaboratoriu...", multes, sentencies xudiciales y hores y hores de trabayu pegando cartelos y faciendo milenta actos pa que la vindicación del asturianu y de lo asturiano tuviera presente nos más de los sitios posibles. Poro, si llega la oficialidá nun hai que-y lo agradecer a nengún partíu, hai que s'allegrar porque una llingua milenaria nun va morrer si siguimos poniendo procuru n'ello, hai que s'allegrar porque ganó'l movimientu de vindicación llingüistica y hai que s'allegrar porque un pueblu, l'asturianu dio un pasu más col que mirar con daqué d'enfotu'l so futuru como pueblu.

¡L'asturianu llingua oficial!

Un saludu.