La suerte ta echada L'ASTURIES LLIBERAL

03/03/2008 GMT 1

La suerte ta echada

circululliberal @ 14:55

Artículu d'Inaciu Iglesias, editor de Les Noticies.

Cuento que nun digo mentira si afirmo qu'esta selmana publicamos una entrevista histórica en LES NOTICIES. Nos últimos meses, años inclusive, veníase notando un evidente cambiu d'enfoque nel Partíu Popular asturianu respective al tratamientu a dar al nuestru idioma. Con too y con ello, había una cierta inercia d'escepticismu. Estes coses lleven tiempu y yera fácil confundir prudencia con indecisión. Echábase en falta una declaración explícita d'apoyu a la oficialidá. Una toma de posición de parte de la cúpula del aparatu que nun diera pie a enquívocos; una afirmación clara y honesta. Bueno, pues con esta entrevista yá la tenemos.
Gabino de Lorenzo, candidatu a les elecciones xenerales pola nuestra circunscripción, actual alcalde d'Uviéu y vicepresidente del Partíu Popular asturianu, afirma textualmente que «la oficialidá pue formar parte de la solución al problema del asturianu». Con esta frase, pal candidatu popular la oficialidá acaba pasar de ser un asuntu polémicu a ser una solución. Una ferramienta cola que dar salida a una carencia. Un instrumentu en positivu. Como digo, cuento qu'esta de Gabino de Lorenzo ye una declaración histórica; una reafirmación que va marcar un primero y un depués y que va quitar bien de telarañes a la nuestra nomenclatura política.

Hai años, el compromisu d'Izquierda Xunida cola normalización del asturianu rompió munchos esquemes. Daquella tardóse n'entender que la so maniobra, siendo política, nun yera oportunista. Cuando les penúltimes elecciones a rector, pasó un poco lo mesmo. El primeru n'atrevese foi'l candidatu teóricamente menos progresista y, cuatro años depués, tolos rectorables acabaron contemplando la realidá del nuestru idioma y el so futuru nos sos programes. Les coses lleven un tiempu. Por eso, dientro'l PP, esti pasu alantre de Gabino vien a sumase a la inequívoca toma de postura de la otra vicepresidenta del partíu, Pilar Pardo, y a la inclusión d'asturianistes destacaos en cargos relevantes. Nada ye casual. Y hasta les formes son adecuaes: en mediu la campaña electoral y por escritu. Yá m'entienden: pa evitar malentendíos.

Cuando Xulio César, l'emperador romanu, cruzó coles sos tropes el ríu Rubicón sabía que nun tenía vuelta atrás, que la suerte taba echada, que la decisión taba tomada y tocaba ser consecuentes. Salvando les distancies, agora, una y vuelta el partíu popular ta asumiendo que'l nuestru idioma merez el mesmu tratamientu constitucional que los demás, sabe que tampoco nun queda marcha atrás. La FSA podrá poner más o menos taches; podrá tar más o menos roceana; pero la lóxica democrática va acabar imponiéndose. Y los que contaben marcar el pasu agora nun van tener otro que siguir el de los demás. La suerte ta echada.