L'ASTURIES LLIBERAL
Bitácora del Círculu Lliberal d'Asturies

El Partíu Popular xixonés vien colgando nos últimos años nueves n'asturianu na so páxina web. La última, titulada El Partíu Popular denuncia’l bloquéu municipal a la promoción de la llingua asturiana, reproducímosla darréu:

El Partíu Popular denuncia’l bloquéu entamáu pol equipu de gobiernu de Paz Fernández Felgueroso a la promoción de la llingua asturiana. Ansí, sigún los populares, “adícase cómo dende l’añu 2004 ta paralizada la presentación d’una ordenanza municipal pal usu del asturianu, al tiempu que fai recordanza de la dimisión nel so momentu del Conseyu Asesor de la Oficina Municipal de la Llingua pola mor del refugamientu continuáu a la normalización llingüística fechu polos responsables del PSOE y IU”.

Pal Partíu Popular, dende la dimisión de tolos miembros del citáu Conseyu Asesor, “l’Ayuntamientu de Xixón nun fizo nengún avance significativu en nenguna de les estayes que conformen la política llingüística: permanez la precariedá de la Oficina Municipal de la Llingua tanto en recursos humanos como técnicos, nun s’anovó’l Conseyu Asesor d’esti departamentu, malapenes s’aplicó la toponimia oficial aprobada por unanimidá nun Plenu Municipal de 2006 nel usu alministrativu y na retulación”. En definitiva, l’equipu de gobiernu, col asturianu vende fumo y nun fai nada.

El PP, vista l’actual situación, propón un conxuntu de midíes empobinaes a una verdadera promoción de la nuestra llingua autóctona, ente les que destaquen l’aprobación d’unes ordenances municipales pal usu del asturianu, la potenciación de la Oficina Municipal de la Llingua y la creación d’un nuevu Conseyu Asesor, el diseñu y execución d’un Plan Municipal de Política Llingüística, l’usu del asturianu na publicidá institucional del conceyu, l’usu de los topónimos oficiales en señales, mapes y documentos o el facilitar l’accesu de la ciudadanía a productos y servicios n’asturianu de tou tipu.