L'Asturies Lliberal

Xuristes pol Asturianu: El Partíu Popular y la llingua asturiana

Va unos díes lleímos na prensa unes declaraciones del Alcalde d’Uviéu onde s’amosába, bien a les clares y con pallabres que nun dexaben dulda, el so esmolecimientu pola situación de la nuestra llingua. Díes dempués, otru cabezaleru del PP, el Sr. Aréstegui, venía a espresase de mou asemeyaú y amestando que les coses nun podíen siguir como hasta agora. Güei (14 d’avientu),vuelven salir otres declaraciones del dichu Sr. nel mesmu sen y diz, amás, qu’han buscase fórmules d’oficialidá, pero ensin qu’ello lleve aunío una obligación.

Énte esto, l'Aconceyamientu de Xuristes pol Asturianu quier afalar al PP pa que siga per esi camín y faiga lo que tea na so mano, que de xuru que nun ye poco, pa que nel venideru camudamientu del Estatutu d’Autonomía la nuestra llingua algame el status que se merez.

Hasta anguaño, dende los gobiernos que tuvimos, sólo na dómina de los Sres. Marqués (PP, primero y URAS, dempués) y Sánchez Vicente fizóse dalgo dafechamente serio pa da-y puxu al asturianu: la Llei d’usu y promoción del asturianu. Dende aquella, y en cuantes qu’entró a gobernar el PSOE, tol desarrollu de la Llei tuvo de dir sacándose a la fuercia (protestes de páis, de sindicatos), pues el primer gobiernu del Sr. Álvarez Areces nun puso enfotu dalgunu en desarrollala. Del segundu gobiernu, el del PSOE-IX, nun fai falta dicir nada. A la vista ta lo que ficieron. Munchu glayar col pautu de gobiernu, pero al final nada de nada: un Plan de Normalización Social del Asturianu que yera una bona ferramienta, pero que nin s’atrevieron a asoleyar nin lu cumplieron, y sinón que-y lo entruguen a la Sra. Ramos, que bien s’encargó (y s’encarga) de torgar la so aplicación na so Conseyería, énte el silenciu de los miembros del Gobiernu d’IX que taben al tanto de too ello y nun dixeron nin una pallabra.

Por eso, nun momentu onde va ser decisiva la actitú del PP, como xuristes que queremos que l’emplegu del asturianu seya un derechu pa toos, ofrecemos-y dende equí tol sofitu xurídicu na busca de les soluciones de les que fala el Sr. Aréstegui, que faigan posible dexar talu derechu bien afitáu nel venideru Estatutu d’Autonomía.  Como se pue ver, equí nun falamos d’imposición nin d’obligacilón (l'únicu que lo fai ye’l PSOE) sinón d’usu llibre de la llingua. Que’l PP tire p’alantre con esta cuestión ye dalgo que nos paez enforma importante.

Xosé María Estrada Janáriz.
 
Presidente del Aconceyamientu de Xuristes pol Asturianu

circululliberal @ 19:12

Esbilla | del.icio.us