José Suárez Arias-Cachero, conceyal de cultura d'Uviéu, abre la muestra de la Fundación "La Caixa" con una intervención n'asturianu L'ASTURIES LLIBERAL

El conceyal de Cultura del Ayuntamientu d'Uviéu, José Suárez Arias-Cachero, anunció esti miércoles, durante la presentación de la muestra "Neolítico, de nómadas a sedentarios" de la Fundación La Caixa, el so enfotu porque la siguiente esposición que la Obra Social de la entidá lleve a la capital asturiana tenga los cartelos billingües, aidando asina na normalización de la llingua asturiana. "Va facese billingüe dafechu", sorrayó'l conceyal, qu'esplicó que na esposición que podrá visitase hasta'l 25 de marzu, nun pudo facese asina porque los paneles yá taben fechos, pero sí s'editaren dos folletos informativos, ún en castellanu y otru n'asturianu. Según Arias-Cachero, que fizo la rueda de prensa n'asturianu, con esta iniciativa va espardese l'emplegu normal de la llingua, lo mesmo que faen nel restu los sitios nos que "los españoles tienen la suerte de ser billingües". Igualmente dixo qu'esti yera'l mou de contestar a les declaraciones del delegáu del Gobiernu, Antonio Trevín, nes que consideraba que l'alcalde d'Uviéu, Gabino de Lorenzo, usaba l'asturianu namás que pa "babayaes". "Nun vamos aceutar, y tamos demostrándolo con esti exemplu, espresiones d'esti calter vengan de quien vengan, sobre manera d'una persona que foi presidente del Principáu y nun fizo nada pola normalización del asturianu y que siendo delegáu del Gobiernu nun almite a trámite, nel rexistru de la Delegación, escritos n'asturianu".