L'ASTURIES LLIBERAL

Artículu d'Humberto Gonzali,

miembru de la Xunta Directiva del Partíu Popular de Xixón.

Publicáu en La Nueva España

 

El pasáu 31 de xineru la representación del Partíu Popular na Xunta Rectora de la Fundación Municipal de Cultura pidió que s’aplicara la toponimia oficial del Conceyu de Xixón, la mesma que s’alcordara por unanimidá en Plenu Municipal y que se publicara nel BOPA del 3 d’ochobre de 2006. Fízose sabiendo qu’en pasando más d’un añu dende la reforma de los topónimos xixoneses, el so usu nesta estaya de l’alministracion municipal, como nel restu, yera bien escasu, cosa nada rara en conociendo’l pocu enfotu pa cola nuestra llingua que siempre amuesaron los equipos de gobiernu d’izquierda nel nuestru Ayuntamientu. En Xixón hai un númberu notable de potenciales falantes del asturianu. Según l’estudiu caberu, un 40% de los xixoneses tien capacidá d’usu abondo pa falar y un 16% yá ta alfabetizao nel idioma autóctonu d’Asturies. D’otra parte, los xixoneses suspenden xeneralmente a les instituciones públiques en cuantes a les acciones empobinaes a protexer y promover la llingua. Namás ún de cada siete xixoneses cree que les autoridaes del Principáu y del Ayuntamientu de Xixón faen tolo posible en materia de política llingüística. El casu ye que na pasada llexislatura, y no que va d’ésta, el gobiernu municipal de la izquierda nun tuvo andao más allá de lo anecdótico na defensa d’esta parte fundamental de la identidá asturiana. Solo l’entamu de la Oficina Municipal de la Llingua y el so trabayu, amenorgáu pol curtiu apoyu recibíu dende l’Ayuntamientu, aporten dalgo de lluz na escuridá qu’espeya la ineptitú del equipu de gobiernu municipal, mui particularmente dende la so parte mayoritaria, la socialista. La prueba más clara del non facer d’estos rexidores fuera la dimisión en bloque del Conseyu Asesor de la mentada Oficina ante la quiebra del compromisu d’una izquierda que vende fumo y nun fai nada, que promete y escaez bien aína lo prometío, y que convierte en papel moyao día tres día l’únicu avance llegal col que cuenta la llingua, la Llei 1/98 de 23 de marzu, d’Usu y Promoción del Asturianu; un llogru del centru derecha xeneráu na Xunta Xeneral del Principáu polos diputaos del Partíu Popular y un diputáu del PAS. Nun hubo más clara demostración del talante socialista pa cola nuestra fala vernácula que la dada por Vicente Álvarez Areces, cuando en llegando al gobiernu autonómicu con mayoría absoluta en 1999, lo primero que fizo pol asturianu foi desfacer la Oficina de Política Llingüística del Principáu. Nesi momentu tolos asturianos pudimos conocer la verdadera cara del socialismu asturianu, de qué manera trata la xente de la FSA a la cultura y tradiciones d’esta tierra. Anguañu, l’Ayuntamientu de Xixón nun tien unes ordenances municipales pa l’aplicación reglada d’esta llei nel so ámbitu porque, digámoslo claro, al PSOE local nun-y da pola gana, porque l’actual alcaldesa desprecia a los asturianos al despreciar  a la so milenaria llingua, y porque la otra parte del equipu de gobiernu municipal, Izquierda Unida, nun tien nengún interés por facer de la defensa de la identidá idiomática de los xixoneses un motivu de rocea colos sos socios. Xixón necesita otru xeitu de dar espacios de dignidá, de llibertá, a la llingua de Xovellanos, y eso, a la vista los fechos y la historia recién, namás pue llegar dende otra concepción del gobiernu municipal, dende una concepción moderna, democrática y honesta de los asuntos públicos. La llingua necesita pa llograr un futuru en Xixón, y n’Asturies, una visión de la realidá sociollingüística como la que defende’l Partíu Popular. Una visión que refugando toa imposición a los ciudadanos, asegure tamién el derechu civil d’éstos a usar con normalidá la llingua, y en tolos ámbitos, si ési ye’l so deséu. Ensin obligatoriedá, nel camín del reconocimientu d’un derechu, el Partíu Popular ta en disposición de llegar a onde faiga falta p’atender una demanda social que crez de contino. Los xixoneses, los asturianos, son xente tranquilo que se decata de toes toes de la so identidá, que quier que les alministraciones contribuyan al caltenimientu d’ésta, ensin qu’ello signifique confrontación con otres identidaes, nin polítiques coercitives, nin fixación d’incompatibilidaes. Los xixoneses saben y quieren ser, al empar, asturianos y españoles. Una alternativa lliberal pa la llingua, pa la propia cultura y identidá, simpre articulará’l so facer dende la idea d’ufiertar la igualdá de los derechos pa poder ufiertar igualmente la llibertá d’elección. Una alternativa lliberal siempre será clara nel diseñu de les sos polítiques, separtándose de promeses gratibles y gratuites, y plantegándose midíes con unos oxetivos concretos y unos plazos asumibles y especificaos. En Xixón, esa alternativa que representa dafechamente’l Partíu Popular, entamaría’l so trabayu dende’l marcu de la Llei d’Usu actual, mentantu nun hubiere otru, pa xestionar, promover, alcordar y iguar. En Xixón, el Partíu Popular evaluaría les necesidaes del asturianu pa, dende l’alministración municipal, dir promocionando’l so usu nes estremaes estayes de la vida cultural, económica y social del conceyu. La llingua habría de tar na documentación alministrativa, nes comunicaciones, nes anuncies, na retulación, nos cartafueyos, ye dicir, na realidá diaria de la Casa Conceyu y el conxuntu d’instalaciones municipales. Pa ello, daríense con traza los pasos necesarios. El logotipu del conceyu, un importante referente visual pa los ciudadanos, usaríase en forma billingüe nes dependencies municipales, vehículos y soportes informativos de les víes públiques. Bilingüe sería la retulación nos edificios del Ayuntamientu, nos nomes de calles, nos paneles con proyectos del conceyu. Billingües seríen los documentos alministrativos (los impresos, les factures, los bandos, les ordenances...); como tamién seríen billingües la publicidá institucional y les publicaciones municipales. Ye relevante que les autoriades faigan usu del asturianu, nos actos y davezu, siempre dientro de la competencia pa ello de caún. Una alternativa lliberal, una alternativa del Partíu Popular, promovería cursos d’asturianu ente’l funcionariáu, siempre vountarios, y facilitaría l’acccesu del personal a vocabularios especializaos. Los topónimos oficiales de los llugares del conceyu tendríen un emplegu xeneralizáu y inmediatu. L’ayuntamientu de Xixón entamaría una campaña en collaboración colos centros d’enseñanza pa que los escolares apreciaren enforma la llingua d’Asturies. Nel ámbitu empresarial y económicu, una alternativa lliberal espondría les potencialidaes y aspectos positivos del usu de la llingua na actividá comercial, como imaxe corporativa, nes campañes publicitaries; amás d’apoyar la normalización nesti sector con ayudes al usu o con ameyoramientos fiscales. En cuantes al mundu de la cultura, del deporte, del asociacionismu ciudadanu, l’Ayuntamientu habría promover y favorecer con midíes concretes la presencia del idioma nos servicios d’estes estayes. En definitiva, una alternativa como la que representa’l Partíu Popular, trataría la cuestión llingüística y identitaria dende’l másimu respetu a la realidá de la sociedá xixonesa, con un diálogu permanente y sinceru colos colectivos implicaos na defensa del asturianu, y col envís de llograr una verdadera normalización, un futuru dignu pa la más visible de les nuestres señes d’identidá. Fuxendo de los xestos vacios, de los amiguismos, de les imitaciones. Trabayando dende la garantía d’honradez, bon xuiciu y tresparencia democrática que siempre aporten los principios del Partíu Popular. Ésti ye’l tipu de política llingüística que-y demandaremos al actual equipu de gobiernu del Ayuntamientu de Xixón.

Esbilla | del.icio.us