L'ASTURIES LLIBERAL

Humberto Gonzali

 

Que la TPA ye un inventu pa mayor allabancia del presidente Vicente Alberto yá naide nun lo discute, sacantes los socialistes recalcitrantes.

Que la TPA tien programes intragables, cuando non faltosos pa cola asturianidá, podemos comprobalo tolos díes.

Que la TPA cuenta con una audiencia ridícula ye algo que nos descubren toles estadístiques. La única escepción a esta pésima regla ye parte de la curtia programación n'asturianu.

Que la TPA va a costanos a tolos ciudadanos asturianos munches más perres de les que nos decíen los voceros de la gobernanza socialista, vémoslo bien a les clares dende poco dempués del entamu d'esti preséu de propaganda areciana.

Dicho lo anterior yo apostaría por una reconducción lliberal. ¿Y eso qué ye?. Pues fácil. Zarrar la parte de chiringuitu que tien la TPA. Abaratar el so costu y abrila al enllaz col entramáu de televisiones locales del país. Afitar una programación centrada na información y na difusión cultural, fecha siempres dende'l respetu a Asturies y col envís de promocionar lo que nos ye más identitariu. Y claro ta, emitir n'asturianu. Porque una televisión autonómica entamada nun país con llingua propia tien de valir, más que nada, pa contribuyir na normalización d'esa llingua. Esto último ye lo que la FSA nun entiende, nin ta por querer entender. Lo de so ye'l progresismu y l'internacionalismu, y nesa manera vieya y sectaria de ver Asturies nun cueyen les realidaes llingüístiques ayenes al so suañu Zapaterín. Lo tristayo ye qu'hai asturianistes (o asina s'autodenomen) que dicen preferir un trunfu socialista nes elecciones a la mesma oficialidá de la llingua. ¿Paez raro?. Nun lo sé, pero esto tamién ye Asturies.

Esbilla | del.icio.us